Այս ուսումնական տարում Հադրութի շրջանի Քյուրաթաղի Գառնիկ Գասպարյանի անվան միջնակարգ դպրոց է հաճախում 11 առաջին դասարանցի:
Քյուրաթաղի դպրոցի աշակերտների թիվը աճում է
ՍՏԵՓԱՆԱԿԵՐՏ, 13 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում այս մասին տեղեկացրել է տնօրեն Արման Պողոսյանը և ընդգծել, որ դպրոցի աշակերտների ընդհանուր թիվը 58 է:
Արման Պողոսյանը 2-րդ ուսումնական տարին է ինչ Քյուրաթաղի միջնակարգ դպրոցում որպես տնօրեն է աշխատում։
«Հուրախություն բոլորիս՝ այս ուսումնական տարում դպրոցի աշակերտների թիվը 5-ով ավելացել է: Մեր դպրոցում ուսուցիչների պակաս չկա։ Կրթօջախը համալրված է նաև օտար լեզուների մասնագետներով։ Մեր դպրոցում գործում է նաև նախադպրոցական խումբ, որը շատ ուրախալի փաստ է, որովհետև գալիք ուսումանական տարում ևս աշակերտների թվի աճ է գրանցվելու։ Ամենայն պատասխանատվությամբ են ուսուցիչները մոտենում իրենց վստահված գործին՝ ուսուցչի առաքելությանը, քանզի քաջ գիտակցում են, որ դպրոցում է կրթվում ու դաստիարակվում Արցախի սահմանը հսկող ապագա զինվորը: Այո, Քյուրաթաղում, ինպես նաև Արցախի մնացած մեծ ու փոքր գյուղերը կանգուն պահողը, երկիրը շենացնողը, բերք ու բարիք արարողը, հայրենիքի պաշտպանը դպրոցում դաստիարակվող այսօրվա աշակերտն է»,- ասել է Արման Պողոսյանը և ուրախությամբ հավելել, որ 1 տասնամյակից ավել է, ինչ իրենց գյուղում այսքան առաջին դասարանցի չի հաճախել դպրոց և որ արդեն երկրորդ տարին է, իրենց դպրոցում աշակերների թիվը միայն աճում է: