Ադրբեջանական «APA» լրատվամիջոցի տեղեկատվությունը, թե Իլհամ Ալիևն ընդունել է Եվրոպական ժողովրդական կուսակցության անդամներին՝ կուսակցության փոխնախագահ Մարիո Դավիդի ղեկավարությամբ, թվիթերյան իր էջում հերքել է ԵԺԿ նախագահ Ջոզեֆ Դոլը:
ԵԺԿ նախագահ Ջոզեֆ Դոլը հերքել է, թե Բաքվում Իլհամ Ալիևն ընդունել է իրենց կուսակցության պաշտոնական պատվիրակությունը
ՍՏԵՓԱՆԱԿԵՐՏ, 27 սեպտեմբերի, ԱՐՑԱԽՊՐԵՍ: Նա գրել է․«Ես հերքում եմ «APA»-ի հրապարակումը․ԵԺԿ-ի ոչ մի պատվիրակություն պաշտոնական այցով Ադրբեջանում չէ»:
Հետո մեկ այլ գրառմամբ նա ավելացրել էր․«Եվրամիության քաղաքական գործիչները Բաքվում են՝ ուսումնասիրելու հանրաքվեն և գործում են իրենց մասնավոր կարողությունների շրջանակներում, և Մարիո Դավիդը այլևս ԵԺԿ-ի փոխնախագահը չէ»:
Նշենք, որ ադրբեջանական լրատվամիջոցը տարածել էր տեղեկատվություն, ըստ որի՝ Ադրբեջանի նախագահ Իլհամ Ալիևը ընդունել է Եվրախորհրդարանի անդամներից, եվրոպական երկրների խորհրդարանականներից և մի շարք միջազգային կազմակերպությունների աշխատակիցներից կազմված պատվիրակություն՝ Եվրոպական ժողովրդական կուսակցության փոխնախագահ Մարիո Դավիդի առաջնորդությամբ:
Նշվել է, թե Մարիո Դավիդը խոսել է զարգացող Ադրբեջանի և ԼՂ հիմնախնդրի մասին: «APA»-ի հաղորդմամբ՝ նա մասնավորապես ասել է, թե, որպես ԵԺԿ ներկայացուցիչներ նրանք կարող են նպաստել հակամարտության վերաբերյալ միջազգային հանրության իրազեկվածության բարձրացմանը: Նա ասել է, որ նրանք աջակցում են Ադրբեջանի՝ միջազգային իրավունքի վրա հիմնված կառուցողական դիրքորոշումը հայ-ադրբեջանական ԼՂ հիմնախնդրի հարցում: