Ընթացիկ տարվա հոկտեմբերի 19-22-ն արցախցի մարզիկները կմասնակցեն Սանկտ Պետերբուրգում կայանալիք խառը մենամարտերի (MMA) մեծահասակների եվրոպայի առաջնությանը :
Արցախցի մարզիկները մասնակցելու են եվրոպայի առաջնություններին
ՍՏԵՓԱՆԱԿԵՐՏ, 4 հոկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Արցախի մարտարվեստների ասոցիացիայի նախագահ, խառը մենամարտերի գլխավոր մարզիչ Գարեգին Աղաբալյանը` նշելով, որ խառը մենամարտերի (MMA) եվրոպայի առաջնությանը երկրորդ անգամ է, որ մասնակցում են:
«Խառը մենամարտերի (MMA) եվրոպայի առաջնությանը Արցախից Սերգեյ Ավանեսովը մինչև 61,2 կգ , Թաթուլ Ավագյանը 70,3 կգ և Դավիթ Խաչատուրյանը մինչև 65,8 կգ քաշային կարգերում են մասնակցելու»,-ասել է Գ. Աղաբալյանը:
Արցախի մարտարվեստների ասոցիացիայի նախագահն ընդգծել է, որ արցախցի մարզիկները հոկտեմբերի 27-ին մասնակցելու են նաև Գերմանիայում տեղի ունենալիք Եվրոպայի K-1 մարզաձևի առաջնությանը (12-19 և 19-ից բարձր տարիքային խմբեր):
«Արցախից «Եվրոպայի K-1» առաջնությանը մասնակցելու է 6 մարզիկ: 2014 թվականին 15-16 տարիքային խմբում Արցախից Դավիթ Հայրապետյանը դարձել է եվրոպայի չեմպիոն: 2015 թվականին մասնակցել ենք K-1-ի աշխարհի առաջնությանը, որտեղ մեծահասակներից Ալեքսան Աղաբալյանը գրավել է 2-րդ տեղը: Վնասվածքի պատճառով էլ Դավիթ Հայրապետյանը գրավել է ևս 2-րդ տեղը»,-ասել է Գ. Աղաբալյանը և հավելել, որ իրենց առաջնային խնդիրը մրցաշարերին մասնակցելը ու փորձ ձեռք բերելն է:
Գ. Աղաբալյանը նշել է նաև, որ K-1-ի առաջնությանն իրենք ակնկալում են լավ արդյուքներ:
«Այս շրջանում առկա է դժվարություն այն առումով, որ միանգամից 2 տարբեր մարզաձևերից մարզիկներ ենք պատրաստում եվրոպայի առաջնությանը: Հիմա ընթանում են նախապատրաստական մարզումները»,-ավելացրել է Գ. Աղաբալյանը:
Արցախի մարտարվեստների ասոցիացիայի նախագահը տեղեկացրել է նաև, որ հոկտեմբերի 4-ից Մարտունու շրջանի Գիշի համայնքի Մոնթե Մելքոնյանի անվան մարզահամալիրում խառը մենամարտերի (MMA) մարզաձևից բացվելու է նոր ակումբ, որը լրիվությամբ գործելու է անվճար. Գիշի գյուղում մարզումներն անց է կացնելու մարզիչ Ազատ Ադամյանը:
Հարակից գյուղերից պարապմունքներին մասնակցել ցանկացող երեխաներն այսօրվանից իսկ կարող են հաճախել մարզումների:Ի դեպ, հաճախողների համար տարիքային սահմանափակումներ չկան:
Խառը մենամարտերի (MMA) գլխավոր մարզիչն իրազեկել է, որ Շուշիիում ևս բացվելու է խառը մենամարտերի (MMA) ակումբ. ցանկություն ունեն քիք-բոքսինգ մարզաձևի պարապմունքների համար էլ ակումբ բացել:
