Շուշիի «Տանկ» հուշարձանի մոտ այսօր տեղի է ունեցել Լիտվայի մայրաքաղաք Վիլնյուսում անցկացված «Եվրոպայի կա-մեկ» առաջնությունում մինչև 68 կգ քաշային կարգում Եվրոպայի չեմպիոնի տիտղոսը նվաճած, ԼՂՀ մարտարվեստների ասոցիացիայի սան Դավիթ Հայրապետյանի դիմավորման արարողությունը։
Շուշիում հանդիսավորապես դիմավորել են Եվրոպայի չեմպիոնի տիտղոսը նվաճած Դավիթ Հայրապետյանին (տեսանյութ)
ՍՏԵՓԱՆԱԿԵՐՏ, 26 ՆՈՅԵՄԲԵՐԻ, ԱՐՑԱԽՊՐԵՍ: Նրան դրոշներով ու պաստառներով դիմավորելու էին գնացել ընկերներն ու երկրպագուները, ովքեր Եվրոպայի չեմպիոնին դիմավորել են ծափահարություններով ու դափնեպսակով։
«Արցախպրես»-ի թղթակցի հետ զրույցում Դավիթ Հայրապետյանն ասաց, որ թեև բացարձակ հաղթանակ է տոնել եզրափակչում, բայց խոստովանեց, որ այն դժվարությամբ է իրեն հաջողվել։ «Ունեցել եմ երեք մենամարտ, որտեղ եզրափակիչ փուլում նոկաուտի եմ ենթարկել Բելոռուսի ներկայացուցչին»,-ասել է Դ. Հայրապետյանը և հավելել, որ տպավորությունները շատ մեծ են։
Նշենք նաև, որ մրցաշարին մարզիչ Գարեգին Աղաբալյանի գլխավորությամբ Արցախից հանդես է եկել նաև ԼՂՀ մարտարվեստների ասոցիացիայի ևս մեկ մարզիկ՝ Ալեքսան Աղաբալյանը: Ինչպես նշեց գլխավոր մարզիչը հնարավոր էր ավելի շատ հաջողություններ արձանագրել, եթե Ալեքսան Աղաբալյանը առաջնության սկզբում լուրջ վնասվածք չստանար։ «Դավիթ Հայրապետյանը բարձր մակարդակով ներկայացավ առաջնությանը և փայլուն հաղթանակ տարավ մանավանդ եզրափակչում՝ նոկաուտի ենթարկելով իր մրցակցին»,- ասաց Գ. Աղաբալյանը և ավելացրեց, որ արդեն իսկ մտածում են աշխարհի առաջնությունում ունեցած հաջողությունը կրկնելու մասին։