Հարությունագոմեր գյուղը գտնվում է Մարտակերտի շրջանի հարավ-արևմուտքում՝ շրջկենտրոնից 44 կմ հեռավորության վրա. գյուղն ունի 502 բնակիչ:
Հարությունագոմերում զբաղվածության խնդիր չկա, դրա համար գյուղատնտեսությամբ չեն զբաղվում. համայնքի ղեկավար
ՍՏԵՓԱՆԱԿԵՐՏ, դեկտեմբերի 1, ԱՐՑԱԽՊՐԵՍ: «Արցախպրես»-ի թղթակցի հետ զրույցում համայնքի ղեկավար Աշոտ Աբրահամյանն ասել է, որ Հարությունագոմերն ունի 92 հեկտար վարելահող, որը հիմնականում օգտագործվում է աշնանացանի համար: Գյուղում մտադրություն ունեն նաև անցնել գարնանացան բույսերի մշակմանը:
Գյուղացիների զբաղվածությունն ապահովում է «Բեյզ Մեթլս» փակ բաժնետիրական ընկերությունը. գյուղացիների մեծ մասն աշխատում է հենց ընկերությունում:
«Գյուղի «Բեյզ Մեթլս»-ին մոտ գտնվելը հիանալի հնարավորություն է ընձեռում, որ երիտասարդներն ուրիշ տեղ աշխատանք չփնտրեն ու մնան գյուղում: Այդ է պատճառը, որ բնակիչները մեծ ուշադրություն չեն դարձնում անասնապահությանն ու հողագործությանը և հիմնականում իրենց տնամերձներում զբաղվում են գյուղատնտեսությամբ»,- ասել է Ա. Աբրահամյանը:
Հարությունագոմերն ունի հանդիսությունների սրահ և նորակառույց մանկապարտեզ: Գյուղում գործում է միջնակարգ դպրոց: Համայնքի ղեկավարի խոսքով՝ 72 աշակերտ ունեցող կրթօջախում իրենք մասնագետների պակաս չունեն: Ի դեպ, ընթացիկ տարում նախորդ տարվա ութի փոխարեն առաջին դասարան է հաճախել 14 երեխա, որը, նրա խոսքով, արդեն մեծ հաջողություն է:
Անդրադառնալով գյուղի ջրամատակարարմանը՝ Ա. Աբրահամյանը նշել է, որ այդ հարցն արդեն լուծված է:
«Յուրաքանյուր շնչին օրական երկու տոննայից ավելի ջուր է հասնում: Կառավարության միջոցներով շուտով ջրագիծը կվերանորոգվի, և մարդիկ կկարողանան ջուրն էլ ավելի նպատակային օգտագործել»,- ասել է համայնքի ղեկավարը և հավելել, որ համայնքային կենտրոնի կառուցման անհրաժեշտություն ունեն: