Կարմիր խաչի միջազգային կոմիտեի Լեռնային Ղարաբաղի առաքելության տեղեկատվության բաժինը, ի պատասխան «Արցախպրես»-ի հարցադրմանը, հերքել է Ադրբեջանի մարդու իրավունքների հանձնակատար (օմբուդսմեն) Էլմիրա Սուլեյմանովայի այն հայտարարությունը, որ Արցախի Հանրապետությունում ազատազրկված ադրբեջանցի դիվերսանտներ Դիլհամ Ասկերովի և Շահբազ Գուլիևի նկատմամբ դատական պատժամիջոցներն, իբր թե ըստ ԿԽՄԿ-ի, չեն համապատասխանում միջազգային իրավունքի սկզբունքներին:
Կարմիր խաչը հերքել է Ադրբեջանի օմբուդսմենի հայտարարությունը
ՍՏԵՓԱՆԱԿԵՐՏ, դեկտեմբերի 11, ԱՐՑԱԽՊՐԵՍ: «Կարմիր խաչի միջազգային կոմիտեն (ԿԽՄԿ) երբեք չի արտահայտվում ազատազրկման պատճառների, կալանավորման իրավական հիմքերի և դատավճռի իրավասության վերաբերյալ:
ԿԽՄԿ-ն նաև չի զբաղվում ազատազրկված անձանց ազատ արձակելու հարցերով: Մեր հիմնական առաքելությունն է՝ բոլոր ազատազրկվածների համար ապահովել մարդկային վերաբերմունք, ազատազրկման արժանապատիվ պայմաններ և կապ ընտանիքի հետ:
Ժնևի կոնվենցիաներն առավել լայն ճանաչված և ընդունված միջազգային պայմանագրերն են, որոնք կարգավորում են զինված հակամարտության կողմերի պարտավորությունները։ Դրանք նաև հանդիսանում են իրավական հիմք՝ ԿԽՄԿ-ի գործունեության համար:
Ժնևի կոնվենցիաները չեն տրամադրում դատական անձեռնմխելիություն պաշտպանության ներքո գտնվող անձանց։ Դրանցով սահմանվում է դատավարական երաշխիքների ապահովման անհրաժեշտությունը»,- ասել է Կարմիր խաչի միջազգային կոմիտեի Լեռնային Ղարաբաղի առաքելության հաղորդակցման բաժնի պատասխանատու Էթերի Մուսայեյանը:
Հիշեցնենք, որ ադրբեջանական ԱՊԱ գործակալության փոխանցմամբ, այդ երկրի մարդու իրավունքների հանձնակատար (օմբուդսմեն) Էլմիրա Սուլեյմանովան հայտարարել էր, որ Դիլհամ Ասկերովի և Շահբազ Գուլիևի հարցով ինքը հանդիպել է Կարմիր խաչի միջազգային կոմիտեի ղեկավարի հետ: որի ընթացքում իրեն ասել են, որ թե իբրև վերոհիշյալ անձանց նկատմամբ կիրառված դատավճիռը չի համապատասխանում միջազգային իրավունքի նորմերին: