Թուրքիայի, Վրաստանի եւ Ադրբեջանի զինված ուժերի գլխավոր շտաբների ղեկավարներն առաջին անգամ Վրաստանում եռակողմ հանդիպում կանցկացնեն ընթացիկ տարվա աշնանը:
Թուրքիայի, Վրաստանի եւ Ադրբեջանի գլխավոր շտաբների պետերը եռակողմ հանդիպում կանցկացնեն աշնանը
ՍՏԵՓԱՆԱԿԵՐՏ, 23 մայիսի, ԱՐՑԱԽՊՐԵՍ: Այդ մասին ասված Է Վրաստանի պաշտպանության նախարարության կայքում զետեղված հաղորդագրության մեջ: Դրա մասին հայտնի Է դարձել մայիսի 23-ին Վրաստանի, Ադրբեջանի եւ Թուրքիայի պաշտպանության նախարարներ Լեւան Իզորիայի, Զաքիր Հասանովի եւ Ֆիքրի Ըշըքի՝ Բաթումում (Աջարիա) կայացած եռակողմ նախարարական հանդիպման շրջանակներում:
«Պաշտպանական գերատեսչությունների ղեկավարները քննարկել են Վրաստանի, Թուրքիայի եւ Ադրբեջանի գլխավոր շտաբների պետերի եռակողմ հանդիպման կարեւորությունը, հանդիպում, որն առաջին անգամ անցկացվելու Է ընթացիկ տարվա աշնանը, եւ այն ընդունելու Է Վրաստանը»,-ասված Է հաղորդագրության մեջ: Հանդիպման ընթացքում նախարարները քննարկել են նաեւ պլանավորված եռակողմ զորավարժությունները: Վարժանքների անցկացման ստույգ ամսաթվերն ու վայրերը անհայտ են մնում:
Վրացական ԶԼՄ-ների տվյալների համաձայն, ընթացիկ տարվա հունիսի 4-ից մինչեւ 14-ը Թուրքիայում կանցկացվեն թուրքա-վրացա-ադրբեջանական Caucasus Eagle զորավարժությունները՝ երեք երկրների հատուկ նշանակության ուժերի մասնակցությամբ: Սեպտեմբեր ամսին կկայանան նաեւ շտաբային համակարգչային վարժանքներ՝ երեք երկրներից ժամանած զինվորականների մասնակցությամբ:
Հանդիպման ավարտից հետո Թուրքիայի, Վրաստանի եւ Ադրբեջանի պաշտպանության նախարարները համատեղ հայտարարություն են ստորագրել, որում ասվում Է, որ երկրները տարածաշրջանային ու միջազգային մակարդակներով կշարունակեն մասնակցել խաղաղության եւ կայունության ապահովմանը:
