Ոստիկանության Մարտունու շրջանային բաժնի պետ Ջիվան Ղահրամանյանը ազատվել է պաշտոնից և գրանցվել Արցախի Հանրապետության ոստիկանության կադրերի ռեզերվում։
Ոստիկանության Մարտունու շրջանային բաժնի պետն ազատվել է պաշտոնից. երեք ծառայողներ ստացել են խիստ նկատողություն
ՍՏԵՓԱՆԱԿԵՐՏ, ապրիլի 4, ԱՐՑԱԽՊՐԵՍ: Այս մասին «Արցախպրես»-ին հայտնեցին ԱՀ ոստիկանության մամլո ծառայությունից: Աղբյուրի փոխանցմամբ՝ այդ պաշտոնում նշանակվել է ոստիկանության Ասկերանի շրջանային բաժնի պետի պաշտոնը մինչ այդ զբաղեցնող Արայիկ Գասպարյանը:
Ոստիկանության Մարտունու շրջանային բաժնի նորանշանակ պետին ներկայացնելու նպատակով ոստիկանապետ Կամո Աղաջանյանն անձամբ հանդիպել է ոստիկանության Մարտունու շրջանային բաժնի անձնակազմի հետ։ Նա խիստ քննադատության է ենթարկել վերջերս Մարտունու շրջանում գրանցված խուլիգանության հանցադեպը և Մարտունու շրջանային բաժնի նորանշանակ պետից պահանջել է բոլոր ուժերը ուղղել նման դեպքերը կանխարգելելու շրջանի օպերատիվ իրավիճակի կայունության անշեղ ապահովման հրամայականին։ Կամո Աղաջանյանը ոստիկանության Մարտունու շրջբաժնի անձնակազմից պահանջել է նպատակային աշխատանքների միջոցով շրջանում ամրապնդել քաղաքացիների կողմից ոստիկանության հանդեպ վստահությունը¸ որի հաջողությունը պայմանավորել է ոստիկանության յուրաքանչյուր ծառայողի արդար և իր օրինական պահանջներում սկզբունքային լինելու հանգամանքով։
Ծառայողական պարտականությունների ոչ պատշաճ կատարման համար ոստիկանության պետի հրամանով ոստիկանության Մարտունու շրջբաժնի երեք ծառայողներ ենթարկվել են «խիստ նկատողություն» կարգապահական տույժի։
Հանդիպմանը ներկա էին Մարտունու շրջվարչակազմի ղեկավար Կարեն Թովմասյանը և շրջանի իրավապահ կառույցների պատասխանատուները:
