Այսօր՝ դեկտեմբերի 19-ին, ԼՂՀ ընդհանուր իրավասության առաջին ատյանի դատարանում վերսկսված Շահումյանի շրջանով ԼՂՀ պետական սահմանն ապօրինաբար հատած ադրբեջանական հետախուզական-դիվերսիոն խմբի երկու անդամների՝ ամբաստանյալ Շահբազ Գուլիևի եւ Դիլհամ Ասկերովի գործով դատական նիստի վիճաբանության փուլը շարունակվել է նաև օրվա երկրորդ կեսին։
Դիվերսանտների գործով դատավճիռը կհրապարակվի դեկտեմբերի 29-ին
ՍՏԵՓԱՆԱԿԵՐՏ, 19 ԴԵԿՏԵՄԲԵՐԻ, ԱՐՑԱԽՊՐԵՍ։ Նախ, հանդես է եկել Սմբատ Ցականյանի հայրը՝ Մեխակ Ցականյանը՝ ով իր ճառում նշել է, որ դատավարությունն անցել է օրենքի սահմաններում և հավուր պատշաճի, և ցանկանում է, որ ամեն մարդ իր արածի համար պատասխան տա օրենքի առաջ։
Այնուհետև պաշտպանական ճառով հանդես են եկել՝ դատապաշտպաններ Էրիկ Բեգլարյանը և Արկադի Իսրայելյանը, ինչպես նաև վերջին խոսքի իրավունքից օգտվել են ամբաստանյալներ Շ. Գուլիևը եւ Դ. Ասկերովը։ Մասնավորապես, ամբաստանյալ Դ. Ասկերովի դատապաշտպան Է. Բեգլարյանը նշել է, որ իր պաշտպանյալը մասնակի է մեղավոր և դատարանից խնդրել է, որպեսզի հնարավորին չափ մեղմ պատիժ կիրառեն, քանի որ վերջինս ունի չորս երեխա։ Իսկ Շ. Գուլիևի դատապաշտպան Արկադի Իսրայելյանը պնդել է, որ իր պաշտպանյալը չի գիտակցել, թե իրականում ինչ նպատակով է հատել ԼՂՀ պետական սահմանը։
Հանդես գալով ճառով՝ իր հերթին ամբաստանյալ Ասկերովը նշել է, որ 2005 և 2007 թթ. սահմանը հատելու, ինչպես նաև ուրիշի տնից գողություն անելու մեջ իրեն մեղավոր է ճանաչում։ Սակայն ընթացիկ տարվա հուլիսին երեք հոգով ԼՂՀ-Ադրբեջան սահմանը հատելու և կատարած այլ հանցագործությունների մեջ մասնակի է ընդունել իր մեղքը՝ փաստարկելով, որ ինքը չի իմացել, որ այն կազմակերպված խումբ է։ Ասկերովն իրեն մեղավոր չի ճանաչել նաև Սմբատ Ցականյանին առևանգելու և ազգային ատելության հողի վրա կատարած նրա սպանության մեջ։ Նրա խոսքով՝ երեխայի սպանության գործում մեղավոր է հանցախմբի մյուս անդամ Հասան Հասանովը։ Իր հերթին ամբաստանյալ Գուլիևը ևս իրեն մեղավոր չի ճանաչել առաջադրված մեղադրանքներում:
Այնուհետև դիտարկումով հանդես է եկել դատախազը՝ պնդելով, որ հնարավոր չէր Գուլիևը չիմանար ԼՂՀ պետական սահմանը խախտելու մասին։
Վերջում դատավոր Անատոլի Թադևոսյանը հայտարարել է, որ դատարանն անցնում է խորհրդակցական սենյակ։ Իսկ դատական վճիռը կհրապարակվի դեկտեմբերի 29-ին։
Հիշեցնենք, որ օրվա առաջին կեսին տեղի ունեցած դատական նիստում դատախազ Կարեն Գաբրիելյանն առաջարկել է ԼՂՀ քրեական օրեսգրքի համապատասխան հոդվածների համաձայն ամբաստանյալ Դ. Ասկերովին դատապարտել ցմահ ազատազրկման, իսկ Շ. Գուլիևին՝ 22 տարվա։
