Թուրքիայի պաշտպանական արդյունաբերության վարչության ղեկավար Իսմայիլ Դեմիրն այսօր հայտարարել է, որ, չնայած Ամերիկայի Միացյալ Նահանգների ճնշմանը, Անկարան շարունակում է քննարկել Ռուսաստանից «Ս-400» զենիթահրթիռային համակարգերի երկրորդ խմբաքանակի ձեռքբերման հնարավորությունը:
Թուրքիան քննարկում է ՌԴ-ից С-400 համակարգերի նոր խմբաքանակ ձեռք բերելու հնարավորությունը
ՍՏԵՓԱՆԱԿԵՐՏ, 3 Մարտի, ԱՐՑԱԽՊՐԵՍ։ Դեմիրի խոսքով՝ Թուրքիան աշխատում է նաև իր զինված ուժերն հզորացնելու ուղղությամբ՝ զարգացնելով սեփական պաշտպանական համակարգերը, փոխանցում է tert.am-ը։
«Այս տարի կմեկնարկի «Սունգուր» և «Հիսար Ա+» համակարգերի մատակարարումը, իսկ ներկայում շարունակվում է «Սիպեր» հակաօդային պաշտպանության ներքին համակարգի զարգացումը», - մանրամասնել է նա:
Անդրադառնալով գնման գործարքի վերաբերյալ ԱՄՆ դիրքորոշմանը, պաշտոնյան շեշտել է, որ «եթե Նահանգները մտածում է, որ դա կհուսահատեցնի ազգային որևէ որոշում կայացնելիս, ապա այն սխալ է մտածում»։
«Մենք ԱՄՆ պատժամիջոցների որևէ անմիջական ազդեցություն չենք նկատել: Տեսնենք, թե ինչպես կգործի CAATSA-ն (ԱՄՆ օրենքը պատժամիջոցների միջոցով Ամերիկայի հակառակորդներին հակազդելու մասին,-խմբ.), բայց այս պահին հստակ հետևանքներ չկան, մենք կսպասենք», - հավելել է նա:
Հիշեցնենք՝ 2020 թ. դեկտեմբերի 14-ին ԱՄՆ իշխանությունները հայտարարել էին Թուրքիայի պաշտպանական արդյունաբերության վարչության, նրա ղեկավարի և հանրապետության երեք այլ քաղաքացիների՝ Մուսթաֆա Ալփեր Դենիզի, Սերհաթ Գենչօղլուի և Ֆարուք Յիգիտի նկատմամբ սահմանափակումներ կիրառելու մասին: Նախկին պետքարտուղար Մայք Պոմպեոյի խոսքով՝ սահմանափակումները «հստակ ազդանշան են այն մասին, որ ԱՄՆ-ն «ամբողջությամբ կիրականացնի CAATSA-ն» և «չի հանդուրժի էական գործարքներ Ռուսաստանի պաշտպանության և հետախուզության ոլորտների հետ»:
Թուրքիայի արտաքին գործերի նախարարությունը դատապարտել էր ԱՄՆ պատժամիջոցները և խոստացել էր պատասխան քայլեր ձեռնարկել: Գերատեսչությունը շեշտել էր նաև, որ Անկարան «չի խուսափի միջոցներ ձեռնարկելուց, որոնք անհրաժեշտ է համարում իր ազգային անվտանգության ապահովման համար»:
Ավելի վաղ Թուրքիայի նախագահ Թայիփ Էրդողանն ընդգծել էր, որ Անկարայի դեմ պատժամիջոցներ կիրառելու Վաշինգտոնի մտադրությունները՝ ռուսական «Ս-400»-ների ձեռքբերման ֆոնին, ՆԱՏՕ-ի կարևոր գործընկերոջ նկատմամբ անհարգալից վերաբերմունքի դրսևորում են:
Ինչպես ավելի վաղ տեղեկացրել էր Tert.am-ը, Ռուսաստանը և Թուրքիան 2017-ին պայմանագիր էին կնքել Մոսկվայի կողմից Անկարային «Ս-400» համալիրների մատակարարման մասին: Թուրքիան ՆԱՏՕ-ի առաջին երկիրն էր, որը ձեռք էր բերել այդ համակարգերը Ռուսաստանի Դաշնությունից: Անկարայի որոշումը առաջացրել էր Վաշինգտոնի և, ընդհանուր առմամբ, դաշինքի անդամ երկրների կտրուկ բացասական արձագանքը:
ԱՄՆ-ն ներկայում էլ չի դադարում փորձել ստիպել Թուրքիային հրաժարվել ռուսական հակաօդային պաշտպանության համակարգերից: Թուրքիայի նախագահ Թայիփ Էրդողանը անցյալ հոկտեմբերին հայտարարել էր, որ Անկարան մտադիր չէ հրաժարվել «Ս-400»-ից՝ չնայած Վաշինգտոնի ճնշմանը: Նա նաև մերժել էր պատժամիջոցների սպառնալիքները և առաջարկել, որ Միացյալ Նահանգները փորձի իրականացնել դրանք:
Հունվարի 11-ին Թուրքիայի պաշտպանական արդյունաբերության դեպարտամենտի ղեկավարը հայտարարել էր, որ հանրապետություն առաքված «Ս-400»-ներն արդեն իսկ պատրաստ են գործարկման:
