Արցախում, գյուղատնտեսի օրվա կապակցությամբ, կազմակերպված այս տարվա բերքի տոնին մասնակցել են հանրապետության շուրջ 200 համայնքներ, և մեկ տասնյակից ավելի տնտեսվարող սուբյեկտներ:
Որքա՞ն մթերք է իրացվել տոնավաճառում. արդյունքներն ամփոփել է գյուղնախարարը
ՍՏԵՓԱՆԱԿԵՐՏ, հոկտեմբերի 11, ԱՐՑԱԽՊՐԵՍ: Այս մասին «Արցախպրես»-ի հետ զրույցում ասել է գյուղնախարար Արամ Մխոյանը՝ հավելելով, որ ցուցահանդես-տոնավաճառի համար գյուղմթերքների տեղափոխման գործընթացին ավելի քան 700 մեքենա է մասնակցել:
«Այս տարի, նախորդ տարվա համեմատ, աննախադեպ ծավալ է ապահովվել բոլոր ուղղություններով: Եթե անցած տարի տոնավաճառի ժամանակ իրացվել է մոտ 400 մլն դրամի մթերք, ապա այս տարի այն անցել է մոտ 600 մլն-ի շեմը»,- ասել է Մխոյանը և հավելել, որ գյուղնախարարությունը հոգացել է միջոցառման մասնակիցների տրանսպորտային ծախսերը:
Նախարարի խոսքով՝ այս տարի միջոցառման հովանավորներից ՀՀ-ում գործող «ՍՊԱՅԿԱ» ընկերությունը նաև որոշ պայմանավորվածություններ է ձեռք բերել մի շարք անհատների ու ընկերությունների հետ՝ գյուղմթերքի արտահանման համար: «Սա նշանակում է, որ արցախյան գյուղմթերքի արտահանման համար նոր հնարավորություններ են ստեղծվում, ինչը միայն ողջունելի է: Այդ հանգամանքը խրախուսելու է տեղում արտադրվող ապրանքների ծավալների մեծացումը և մրցունակության բարձրացումը»,- ասել է նախարարը և ավելացրել, որ կառավարության և գյուղնախարարության կողմից շարունակվելու է ոլորտում աջակցության նոր ծրագրերի իրականացումը:
Նախարարի խոսքով՝ այս տարի ևս իր ծանրակշիռ մասնակցությամբ առանձնացել է Քաշաթաղի շրջանը՝ հաղթելով նաև «լավագույն տաղավար» անվանակարգում:
Իսկ տոնավաճառին ակտիվ մասնակցության համար՝ երեկ կառավարության շենքում տեղի է ունեցել պարգևատրման արարողություն: Գյուղատնտեսության նախարար Արամ Մխոյանը շուրջ չորս տասնյակ անհատների և կազմակերպությունների հանձնել է վարչապետի հուշամեդալ և պատվոգրեր: