Հոկտեմբերի 16-19-ը ԼՂՀ կառավարության նախաձեռնությամբ Ստեփանակերտում կազմակերպվել է փիարի ու քարոզչության վերաբերյալ դասընթացներ, որին մասնակցել են պետական կառույցների հասարակայնության հետ կապեևրի ու տեղեկատվության հարցերով պատասխանատուներ և տարբեր լրատվամիջոցների ներկայացուցիչներ։
Ստեփանակերտում անցկացվել են փիարի ու քարոզչության վերաբերյալ դասընթացներ
Հոկտեմբերի 16-19-ը ԼՂՀ կառավարության նախաձեռնությամբ Ստեփանակերտում կազմակերպվել են փիարի ու քարոզչության վերաբերյալ դասընթացներ, որոնց մասնակցել են պետական կառույցների՝ հասարակայնության հետ կապերի ու տեղեկատվության հարցերով պատասխանատուներ և տարբեր լրատվամիջոցների ներկայացուցիչներ։
Դասընթացներն անցկացնելու համար հրավիրվել էին Երևանի Բրյուսովի անվան լեզվահասարակագիտական համալսարանի տեղեկատվության և հանրային հաղորդակցության գիտակրթական կենտրոնի առաջատար մասնագետները։ Դասախոսությունների և գործնական պարապմունքների միջոցով դասախոսները ներկայացրել են պետական կառույցների փիարի ու քարոզչության առանձնահատկությունները, դրանց արդի մեթոդներն ու եղանակները և լրատվամիջոցների հետ արդյունավետ համագործակցության կազմակերպման, ինչպես նաև տեղեկատվական անվտանգության, դրանց վերլուծության և տեղեկատվական հոսքերի կառավարման ձևերը։
Ինչպես «Արցախպրես»-ի հետ զրույցում նշել է Երևանի Բրյուսովի անվան լեզվահասարակագիտական համալսարանի տեղեկատվության և հանրային հաղորդակցության գիտակրթական կենտրոնի ղեկավար Նվարդ Մելքոնյանը, մասնակիցներին տրվել են պրակտիկ գործիքներ, որոնց օգտագործումը կհեշտացնի նրանց աշխատանքը, ինչը շատ կարևոր է իրազեկման հարցում երկխոսություն ապահովելու համար: «Այս ամենը համագործակցության արդյունք է, քանի որ օգոստոսի վերջին Արցախի վարչապետի մամլո քարտուղար Արտակ Բեգլարյանի հրավերով Ստեփանակերտում պետական գերատեսչությունների հասարակայնության և տեղեկատվության ներկայացուցիչների հետ անցկացրել ենք դասընթաց՝ «Գերատեսչություններ-հասարակայնություն PR համագործակցություն» թեմայով, որից հետո նմանատիպ դասընթացների անցկացման համար նոր հրավեր ենք ստացել»,-ասաց Ն.Մելքոնյանը։
Նշենք, որ այսօր՝ ծրագրի ավարտին, դասընթացների մասնակիցներին հանձնվել են սերտիֆիկատներ։
