ԱՀ Մարտունու շրջանի Նորշեն համայնքում նախադպրոցական տարիքի երեխաները կարիք ունեն մանկապարտեզի:
Նորշենի երեխաները մանկապարտեզի կարիք ունեն. համայնքի ղեկավար
ՍՏԵՓԱՆԱԿԵՐՏ, 23 օգոստոսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Նորշեն համայնքի ղեկավար Բորիս Ասրյանը:
Նրա խոսքով՝ արդեն երկու տարի է, ինչ նոր ուսումնականը մեկնարկում է նորակառույց դպրոցում: Այստեղ սովորում է 56 աշակերտ և աշխատում 22 ուսուցիչ: Իսկ նախադպրոցական տարիքի երեխաները 15- են: Խոսելով մանկապարտեզի մասին՝ համայնքի ղեկավարը նշել է, որ դեռևս շենքային պայմանները բարելավված չեն:
Գյուղում գործող եկեղեցին վերանորոգվել է: Բարեկարգվել են նաև մշակույթի տունը և հանդիսությունների սրահը:
Խոսելով գյուղացիների զբաղվածության մասին՝ Բ. Ասրյանը նշել է, որ 353 բնակիչ ունեցող գյուղում մարդկանց հիմնական զբաղմունքը գյուղատնտեսությունը և անասնապահությունն է:
«Այս տարի կարողացանք ամբողջությամբ վաճառել խաղողի և թթի բերքը ու այդ առումով՝ գյուղատնտեսության ոլորտում մեր համայնքը առաջընթաց է գրանցել» ,- ընդգծել է համայնքի ղեկավարը:
Նորշենի գյուղամիջյան ճանապարհները հիմնականում բարեկարգվել են, բացառությամբ մի քանի ծայրամասային փողոցների, որոնց աշխատանքները ավարտին կհասցվեն առաջիկայում:
Համայնքի ղեկավարը տեղեկացրել է նաև, որ գյուղում կազմակերպվում են տարաբնույթ միջոցառումներ. հունիս ամսին կայացել էր մենապայքարային մարզաձևերի պրոֆեսիոնալ մրցաշար, որի ընթացքում տեղի էր ունեցել տասը մենամարտ:
