Օգոստոսի 30-ին Թուֆենկյան հիմնադրամի միջոցներով Ստեփանակերտում բնակարանամուտ է տոնել պետական սահմանը պաշտպանելիս 2016թ-ին վիրավորված Գագիկ Պետրոսյանի ընտանիքը:
Թուֆենկյան հիմնադրամը հերթական բնակարանն է վերակառուցել վիրավոր զինծառայողի համար
ՍՏԵՓԱՆԱԿԵՐՏ, 31 օգոստոսի, ԱՐՑԱԽՊՐԵՍ: «Արցախպրես»-ի հաղորդմամբ բնակարանամուտին ներկա էին Թուֆենկյան հիմնադրամի գործադիր տնօրեն Րաֆֆի Դուդակլյանը, Արցախի գրասենյակի տնօրեն Էդիկ Գրիգորյանը և հիմնադրամի աջակիցները:
Արցախի գրասենյակի տնօրեն Էդիկ Գրիգորյանը նշել է, որ Գագիկ Պետրոսյանը վիրավորվել է անցած տարի աշնանը: Տան կառուցումը սկսվել էր դեռևս 7 տարի առաջ: Իսկ Թուֆենկյան հիմնադրամի շինարարական աշխատանքները սկսվել են ընթացիկ տարվա հուլիսի 9-ին: Գագիկի կինը Նունեն ևս ծառայում է ԱՀ պաշտպանության բանակի շարքերում: Նրանք ունեն երկու դուստր:
Հիմնադրամի գործադիր տնօրեն Րաֆֆի Դուդակլյանն ասել է, որ «Վիրավոր զինվորների բնակարանային ապահովման» ծրագիրը գործում է 2016 թվականի ապրիլից հետո, և սա արդեն ութերորդ բնակարանն է, որ հանձնվում է վիրավոր ազատամարտիկի: Ծրագրի շարունակությունը լինելու է Ասկերանի շրջանի Պատարա գյուղում: «Սա նվազագույնն է, որ մենք կարող ենք անել մեր զինվորների համար: Եթե նրանք իրենց կյանքն են վտանգի ենթարկում հայրենիքը պահելու համար, արժանապատիվ կյանքով տուն ունենալը նրանց բնակարանով ապահովելը դա մեր բարոյական պարտականությունն է»,- ասել է Րաֆֆի Դուդակլյանը:
Թուֆենկյան հիմնադրամի հոգաբարձուների խորհրդի անդամ Անդրանիկ Գասպարյանն էլ նշել է, որ իրենց հիմնական աշխատանքները լինում են այնտեղ, ուր ազատագրված բնակչություն կա՝ բնակարանների կառուցում, փոքր բիզնեսի հնարավորությունների ստեղծում, աշխատատեղերի բացում: Սակայն ապրիլից հետո գործարկվեց նոր ծրագիր, որի միջոցով սկսվեց վիրավոր զինվորների բնակարանների վերանորոգումը:
Իսկ Թուֆենկյան հիմնադրամի աջակից բելգիահայ Անդրեյ Գյումուշճյանը շնորհավորելով բնակարանամուտը ասել է, որ շատ ուրախ է նրանց երեխաների համար, որոնք մեծանալու են վերանորոգված բնակարանում:
Նշենք, որ Հիմնադրամի աջակիցները նոր ուսումնական տարվան ընդառաջ գրենական պիտույքներ են նվիրել ընտանիքի երեխաներին: