Ֆրանսիայի նախագահ Էմանուել Մակրոնը, անդրադառնալով Վենեսուելայում տիրող ներքաղաքական խառնաշփոթին, հայտարարել է, որ Փարիզն իրեն երկրի ղեկավար հռչակած Խուան Գուաիդոյին նախագահ կճանաչի, եթե առաջիկա ութ օրվա ընթացքում հայտարարվի Վենեսուելայում նոր ընտրությունների անցկացման մասին:
Ֆրանսիան ասել է՝ որ դեպքում Խուան Գուաիդոյին Վենեսուելայի նախագահ կճանաչի
ՍՏԵՓԱՆԱԿԵՐՏ, 26 հունվարի, ԱՐՑԱԽՊՐԵՍ: Tert.am-ի փոխանցմամբ, գրում է ria.ru-ն:
«Վենեսուելայի ժողովուրդն իրավունք ունի ազատ որոշել՝ ինչ ապագա է ցանկանում: Եթե ընտրությունների անցկացման մասին հայտարարվի ութ օրվա ընթացքում, մենք պատրաստ ենք Գուաիդոյին Վենեսուելայի նախագահ ճանաչել»,-իր թվիթերյան միկրոբլոգում գրել է Մակրոնը:
Հիշեցնենք, որ հունվարի 23-ին Գուաիդոն իրեն Վենեսուելայի ժամանակավոր նախագահ է հռչակել, ինչից հետո նրա կարգավիճակը ճանաչել են բազմաթիվ երկրներ, այդ թվում՝ ԱՄՆ-ն, Բրազիլիան, Կանադան ու Կոլումբիան:
Մինչդեռ Ռուսաստանը, Չինաստանն ու Թուրքիան իրենց աջակցությունն են հայտնել Մադուրոյին, որի պնդմամբ՝ ինքն ԱՄՆ-ի կազմակերպած պետական հեղաշրջման փորձի զոհն է:
Մադուրոն Միացյալ Նահանգների հետ խզել է դիվանագիտական կապերը, իսկ Վաշինգտոնն էլ Վենեսուելայում գտնվող իր քաղաքացիներին կոչ է արել լքել երկիրը:
Մադուրոն հայտարարել է, որ Գուաիդոն Միացյալ Նահանգների «խամաճիկն» է, ու անում է այն, ինչ նրանք են ասում:
Նշվում է, որ Վենեսուելայի բարձրագույն ռազմական ղեկավարությունն իր աջակցությունն է հայտնել Մադուրոյին:
