Թուրքիայի գլխավոր ընդդիմադիր ուժը համարվող Ժողովրդահանրապետական կուսակցության նախագահ Քեմալ Քըլըչդարօղլուն ստիպված կլինի 5000 թուրքական լիրայի չափով (մոտ 1000 դոլար) բարոյական փոխհատուցում վճարել երկրի նախագահ Ռեջեփ Թայիփ Էրդողանին՝ նրան ռազմական հեղաշրջման փորձի համար մեղադրվող ուժերի հետ սերտ կապի մեջ մեղադրելու համար։
Թուրքիայի ընդդիմության առաջնորդը ստիպված կլինի բարոյական փոխհատուցում վճարել Էրդողանին
ՍՏԵՓԱՆԱԿԵՐՏ, փետրվարի 1, ԱՐՑԱԽՊՐԵՍ: Ինչպես գրում է թուրքական «Ջումհուրիյեթ» պարբերականը, Անկարայի թիվ 26 առաջին ատյանի դատարանը մասնակիորեն բավարարել է նախագահ Էրդողանի ներկայացրած հայցն ընդդեմ ընդդիմության առաջնորդի՝ պահանջված 250 000 լիրայի փոխարեն 5000 լիրա փոխհատուցում նշանակելով, հայտնում է Tert.am-ը։
Իր ելույթներից մեկում Քըլըչդարօղլուն հայտարարել էր, որ Թուրքիայում 2016 թվականի հուլիսի 15-ին տեղի ունեցած ռազմական հեղաշրջման փորձի համար մեղադրվող ամերիկաբնակ թուրք կրոնական քարոզիչ Ֆեթուլլահ Գյուլենի «Հիզմեթ» խմբավորման ամենամեծ քաղաքական հենարանը հենց Էրդողանն է։
«Թող դատի տա՝ կապացուցեմ», - ասել էր ընդդիմադիր գործիչը։
