Իրանը հիասթափված է իրեն ուղղված մեղադրանքների առնչությամբ, որոնք զարմանալի ու անհիմն են, հայտարարել են Իրանի Իսլամական Հանրապետության արտգործնախարարությունից՝ ի պատասխան Եվրամիության կողմից Իրանի դեմ պատժամիջոցների փաթեթի ընդլայնման:
Իրանը հայտնել է, որ հիասթափված է ԵՄ-ի անհիմն մեղադրանքներից
ՍՏԵՓԱՆԱԿԵՐՏ, 5 փետրվարի, ԱՐՑԱԽՊՐԵՍ: Հիշեցնենք, որ փաթեթում ԵՄ-ն ներառել է մեկ իրավաբանական և երկու ֆիզիկական անձի, որոնց անունները չեն հրապարակվում: Վերջիններս մեղադրվում են ԵՄ տարածքում Իրանի «թշնամական գործունեության» հետ կապ ունենալու համար: Հայտնի է, որ ԵՄ այս որոշումը կապված է Ֆրանսիայում և Դանիայում իրանական հատուկ ծառայությունների հետ կապված սկանդալի հետ: Երկրները մեղադրել են Իրանին տարբեր հարձակումների ու ահաբեկչությունների իրականացման փորձերի համար: Այս առիթով Դանիան հետ էր կանչել Թեհրանում իր դեսպանին, հայտնում է Tert.am-ը:
«Մենք հիասթափված ենք այդպիսի մեղադրանքների ու եվրոպացիների ունեցած մտահոգության առնչությամբ՝ այն դեպքում, երբ հենց Եվրոպայում գործում են ահաբեկչական ու հանցավոր խմբավորումներ», - ասված է Իրանի ԱԳՆ-ի տարածած հայտարարության մեջ:
Իրանը հույս է հայտնել, որ ԵՄ-ն հարցին կմոտենա իրատեսական տեսանկյունից՝ ի տարբերություն «նրանց, ովքեր կիրառում են երկակի չափանիշներ»:
Ինչ վերաբերում է իրանական հրթիռների ճշգրտության ու հեռահարության ավելացմանը՝ հայտարարության մեջ շեշտված է, որ Իրանի նման գործունեությունը կրում է բացառապես պաշտպանական, զսպող ու ազգային բնույթ, և այդ հարցը «երբեք չի եղել և չի լինի այլ երկրների հետ Իրանի բանակցային օրակարգում»: