ՍՏԵՓԱՆԱԿԵՐՏ, 13 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` այս մասին այսօր` փետրվարի 13-ին կայացած ամփոփիչ մամուլի ասուլիսի ժամանակ ասել է ԱՀ գլխավոր դատախազ Արթուր Մոսիյանը և ավելացրել, որ հաշվետու ժամանակահատվածում արձանագրվել է անչափահասների կողմից կամ նրանց մասնակցությամբ կատարված 34 (2017 թ.-ին՝ 45) հանցագործություն, որից 13-ը՝ Ստեփանակերտ քաղաքում, 3-ը՝ Ասկերանի,  8-ը՝ Մարտակերտի, 5-ը՝ Մարտունու, 2-ը՝  Հադրութի, 1-ը՝ Շուշիի,  2-ը՝  Քաշաթաղի  շրջաններում:

«Վերլուծությունը ցույց է տալիս, որ, ինչպես և նախորդ տարիներին, անչափահասների կողմից կատարված հանցագործությունների գերակշիռ մասը  գողության, ծեծի, դիտավորությամբ առողջությանը  վնաս պատճառելու դեպքեր են: Հանցագործություն կատարած 31 անչափահասներն էլ  արական սեռի են, 14-15 տարեկան՝ 4 անձ, 16-17 տարեկան՝ 27 անձ: Նրանցից 16-ը սովորողներ են, 1-ը՝ վարձու աշխատող, 14-ը` այլ զբաղմունքի տեր կամ չաշխատող:  Ողջունելի է այն փաստը, որ, ի տարբերություն 2017 թ.-ի, երբ 20 հանցագործություն կատարվել էր խմբի կողմից, որից 15-ը միայն անչափահասների խմբի կողմից, 5-ը՝ նրանց մասնակցությամբ, հաշվետու ժամանակահատվածում ընդամենը 4 հանցագործություն է կատարվել անչափահասների խմբի կողմից: Ընդհանրացնելով անչափահասների կողմից կամ նրանց մասնակցությամբ կատարված  հանցագործությունների դեպքերը՝ կարելի է արձանագրել, որ դրանք պայմանավորված են հիմնականում դեռահասների մոտ սխալ ընկալված արժեքային համակարգի, ինքնադրսևորվելու ցանկության, ծնողների և մանկավարժների կողմից երեխաների մեջ իրական ու ճիշտ արժեքներ ձևավորելուն ուղղված դաստիարակչական աշխատանքների  անբավարարությամբ: Անչափահասների կողմից հանցագործությունների կատարմանը նպաստող պայման են հանդիսացել նաև վերջիններիս ընտանիքների սոցիալ-կենցաղային ծանր պայմանները, քանի որ, ըստ հանցատեսակների կատարած  վերլուծության, պարզվել է, որ նրանց կատարած հանցագործությունների մեջ մեծ թիվ են  կազմում գողության դեպքերը: Վիճակագրական հիշատակված մտահոգիչ ցուցանիշը վկայում է այն մասին, որ անչափահասների ծնողների, ուսուցիչների և ոստիկանության անչափահասների գործերով տեսուչների կողմից պետք է մշակվեն ու իրացվեն անչափահասների վարքագծի իրավաչափությունն ու պաշտպանունակությունը ապահովող առավել առարկայական, ժամանակակակից մարտահրավերներին համահունչ միջոցառումներ, մոտեցումներ և մեթոդներ, որոնք հնարավորություն կտան շոշափելի արդյունքներ արձանագրել անչափահասների շրջանում արատավոր երևույթները չեզոքացնելու պատասխանատու գործում»,- ավելացրել է Ա. Մոսիյանը: