Հայ օգնության ֆոնդի հովանու ներքո ստեղծված Հայաստանի գիտության և կրթության հայկական ազգային հիմնադրամի (ANSEF) կողմից իրականացվող միջազգային ծրագրերին Արցախի գիտական կենտրոնը 2018 թվականին ներկայացրել է 3 գիտական թեմաներ, որոնցից «Անասնակերերի նոր տեխնոլոգիաների մշակում» թեման հավանության է արժանացել:
Արցախի գիտական կենտրոնի ուսումնասիրությունն ընդգրկվել է միջազգային ծրագրում
ՍՏԵՓԱՆԱԿԵՐՏ, 18 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Արցախի գիտական կենտրոնի փոխտնօրեն, տեխնիկական գիտությունների թեկնածու, թեմայի ղեկավար Անյուտա Սարգսյանը:
Նրա խոսքով՝ Արցախի գիտական կենտրոնը ՀՀ գիտությունների պետական կոմիտեի հետ համագործակցության շրջանակներում արդեն 6 տարի է, ինչ մի շարք ծրագրեր է իրականացնում: Այդ շրջանակներում մտահղացում առաջացավ, որպեսզի կերերի ուսումնասիրման և մանրէաբանության լաբորատորիաներում իրականացվող ծրագրերը համատեղվի և ներկայացվի մեկ ընդհանուր թեմայի տակ:
Խոսելով թեմայի ընտրության մասին՝ Ա. Սարգսյանն ասել է. «Անասնակերերի համար կիրառվող ուսումնասիրված բուսական կազմին ավելացվել է նաև ԱՀ էնդեմիկ պրոբիոտիկ մանրէները. դրանք օժտված են հակամանրէային և պրոբիոտիկ հատկություններով: Թեմայի ուսումնասիրման նպատակն անասնակերերը պրոբիոտիկ մանրէներով հարստացնելն է: Կենտրոնի կողմից կատարված որոշ հետազոտություններ ցույց են տվել, որ պրոբիոտիկ մանէների ավելացումից հետո սիլոսի մեջ սպիտակուցի կենսազանգվածը նույնպես ավելանում է: «Անասնակերերի նոր տեխնոլոգիաների մշակում» թեմայով ծրագիրը պատրաստ լինելու դեպքում կառաջարկվի ԱՀ գյուղատնտեսության նախարարությանը: Ուսումնասիրման ժամկետը մեկ տարի է»:
Մեր զրուցակիցն ասել է նաև, որ սովորական սիլոսացման ժամանակ անասնակերի սննդանյութերի կորստի տոկոսը կազմում է մոտ 10-15 %, իսկ պրոբիոտիկ մանրէներով հարստացնելուց հետո այն նվազում է մինչև 5%-ի չափով: Քանի որ մանէներն օժտված են հակամանրէային հատկությամբ, նրանք կարող են որոշ հակաբիոտիկների փոխարեն օգտագործվել հարստացված անասնակերերի մեջ. այն օգտակար է ինչպես անասունների, այնպես էլ վերջիններիս մսի օգտագործման պարագայում:
«Հակաբիոտիկների օգտագործումը կենդանիների օրգանիզմից դուրս չի գալիս, հետագայում դրանք մուտացիայի է ենթարկվում մարդու օրգանիզմում, որը կարող է հանդիսանալ մի շարք հիվանդությունների սկիզբ: Ստացված սիլոսն ունի յուրահատուկ հոտ և գույն: Այդ սիլոսն օգտագործելուց հետո բարձրանում է նաև կենդանու կաթնատվությունը, բացի այդ պրոբիոտիկ մանրէների կիրառումն անասնակերերի մոտ հնարավորություն է տալիս բարձրացնել ցուլիկների վերարտադրողական համակարգը»,- նշել է ծրագրի ղեկավարը՝ տեղեկացնելով, որ 2017 թվականին կենտրոնի կողմից ևս մեկ թեմա է ընդգրկվել միջազգային ծրագրին:
