2018 թվականին Արցախի Հանրապետության 30 տնտեսվարող սուբյեկտներ մասնակցել են արտասահմանյան ցուցահանդեսների:
2018 թ-ին ԱՀ 30 տնտեսվարող սուբյեկտներ մասնակցել են արտասահմանյան ցուցահանդեսների. նախարար
ՍՏԵՓԱՆԱԿԵՐՏ, 22 մարտի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ մարտի 22-ին, ԱՀ նախագահ Բակո Սահակյանի ղեկավարությամբ կայացած «Արցախի փոքր և միջին ձեռնարկատիրությունների զարգացման ասոցիացիա» հասարակական կազմակերպության ներկայացուցիչների հետ հանդիպման ժամանակ ասել է ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանը:
Նրա խոսքով՝ ցուցահանդեսների մասնակցության գործում մեծ դերակատարություն ունեն Արցախում և Հայաստանում գործող հիմնադրամները:
«Վերոնշյալ երեսուն սուբյեկտները ներկայացնում են տարբեր ոլորտներ: Միջազգային ցուցահանդեսներին հիմնականում մասնակցում են վերամշակող արդյունաբերության և խմիչքների արտադրությամբ զբաղվող ընկերությունները: Մենք պատրաստ ենք նախարարություն ներկայացրած ցանկացած տնտեսվարող սուբյեկտի հայտ քննարկել և աջակցել»,-մասնավորապես ասել է նախարարը:
ԱՀ նախագահն ասել է, որ ցուցահանդեսների մասնակցությունները չպետք է լրիվությամբ ապահովվի պետության կողմից:
«Մենք ունենք տնտեսվարող սուբյեկտներ, երբ նրանք վաստակում են գումարներ, սակայն այդ գումարները չեն ուղղում մասնագիտական կարողությունները բարձրացնելուն, որը ճիշտ չեմ համարում: Վաստակած գումարները պետք է ուղղել նաև ցուցահանդեսներին մասնակցելու, աշխատակիցների մասնագիտական կարողությունները բարձրացնելուն և այլն: Բոլոր այն տնտեսվարող սուբյեկտները, ովքեր դեռ գտնվում են զարգացման շրջանում պետք է ստեղծել հնարավորություն, որ նրանք ևս մասնակցեն ցուցահանդեսների, մասնագիտացված դասընթացների, ինչպես նաև իրենց կարողությունները բարձրացնելուն».-մասնավորապես ասել է Նախագահը:
