ՍՏԵՓԱՆԱԿԵՐՏ, 29 մարտի, ԱՐՑԱԽՊՐԵՍ:  Դասընթացները    վարում  է   Ֆրանսիայի   Տուր  քաղաքից   հրավիրված   ֆրանսերենի  մասնագետ    Միշել  Բուիսուն. նա   Արցախում  է մինչև    մայիսի  8-ը:

«Արցախպրես»-ի  թղթակցի  հետ  զրույցում   Միշել  Բուիսուն  ասել է, որ  ինքն  առաջին  անգամ  է  Արցախում:

«Արցախ  գալու  իմ  նպատակն  է  բացահայտել  այս  հրաշալի   երկիրը, շփվել  արցախցիների հետ, քանի  որ   շատ  ֆրանսիացիների  նման   ես  էլ լսել  էի   Արցախի   ու  նրա  ժողովրդի մասին, բայց  չէի  տեսել: Շատ   տպավորված  եմ արցախցիների խանդավառությամբ: Նրանք մեծ ցանկություն ունեն  ֆրանսերեն սովորելու:  Ես   նույնիսկ  Արցախի   մասին    հոդված եմ  գրել  և  խմբագրություններին  առաջարկել, որ այն  անպայման   հրապարակեն»,-մասնավորապես  ասել  է Միշել  Բուիսուն  և  հավելել, որ    ինքն  արդեն   հասցրել  է  լինել    Շուշիում, այցելել  տեսարժան  վայրեր,   ինչպես  նաև  համտեսել    արցախյան  ուտեստներ:

Մեզ  հետ   զրույցում   «Պոլ  Էլյուարի  տուն  ֆրանկոֆոնիայի  կենտրոն»    հիմնադրամի    տնօրեն  Նելլի  Ավանեսյանն  ասել  է, որ  ֆրանկաֆոնիայի տոնի   կապացությամբ  իրենք  նախաձեռնել  են  մի  շարք   միջոցառումներ, որոնք  մեկնարկել  են   Արցախի  պետական  համալսարանից՝ երկու շաբաթ ուսանողների հետ անցկացնելով  ֆրանսերենի  դասընթացներ. այդ  աշխատանքները  շարունակական  են  լինելու: 

Ն. Ավանեսյանի խոսքով, վաղը՝  մարտի  30-ին,  դպրոցականների  միջև  կազմակերպվելու  է   նաև ինտելեկտուալ  խաղ, որտեղ  ժյուրիի  կողմից  գնահատվելու  է  աշակերտների  ֆրանսերեն   լեզվի    և  ֆրանսիական  քաղաքակրթության  իմացությունը:

«Միշել  Բուիսուն  և   կամավոր  հիմունքներով  Արցախ   ժամանած   ուսանող   Ժոզեֆին   Դրիան    մասնակցում  են  նաև   «Պոլ  Էլյուարի  տուն  ֆրանկոֆոնիայի  կենտրոն»-ի կողմից կազմակերպվող     դասընթացներին: Նման    դասընթացները   մեզ  համար  հնարավորություն  է  ընձեռում, որպեսզի  մենք  կարողանանք ուսանողների   և  ուսուցիչների  մոտ էլ ավելի  զարգացնել  ֆրանսերենի    բանավոր    խոսքը»,-ավելացրել  է  Ն. Ավանեսյանը  և  նշել, որ  ֆրանկոֆոնիայի  կենտրոնի  հիմնական   նպատակներից  մեկն  Արցախում ֆրանսերեն   լեզվի  տարածումն  ու հաստատումն  է:

Խոսելով  «Պոլ Էլյուարի տուն ֆրանկոֆոնիայի կենտրոն»  հիմնադրամի   կողմից  իրականացվող   ծրագրերի   մասին,  մեր  զրուցակիցն  ասել է, որ  այդ  շրջանակներում  ներկայումս   բժիշկների    2    խմբի  համար  անց  են կացվում   վերապատրաստման  դասընթացներ:  Ծրագրի   շրջանակներում արցախցի 2 բժիշկ    վերապատրաստում  է  անցել  Ֆրանսիայում,  ձեռք  բերելով  փորձ, որը կկիրառեն  իրենց   աշխատանքում  և   ունեցած  գիտելիքներով   կկիսվեն գործընկերների  հետ:  Ներկայումս   2   բժիշկ  էլ  գտնվում են  ֆրանսիայում, իսկ   4-ն   էլ   նախատեսվում  է ընթացիկ  տարում:

«Մենք  անում  ենք ամեն  ինչ, որ  Ֆրանսիայի  հետ   բոլոր  այն     կապերը,  որոնք ստեղծվել են Արցախի  հետ,  ավելի  ընդլայնվեն և այդ  շրջանակներում  կազմակերպվեն ավելի   շատ   միջոցառումներ»,-նշել  է   տնօրենը: