ՍՏԵՓԱՆԱԿԵՐՏ, ապրիլի 2, ԱՐՑԱԽՊՐԵՍ:  Համերգին  հնչել  են  հայ, համաշխարհային դասական  և  ժամանակակից  կոմպոզիտորների  ստեղծագործություններ:

«Արցախպրես»-ի  թղթակցի   հաղորդմամբ՝   ողջունելով     ներկաներին՝  ԱՀ մշակույթի, երիտասարդության  հարցերի   և  զբոսաշրջության   նախարար    Լեռնիկ  Հովհաննիսյանը միջոցառմանը    շնորհավորել  է    Արցախի   պետական  կամերային  նվագախմբի   ստեղծման  15-ամյակի  առթիվ  և  մաղթել  ստեղծագործական   նորանոր  վերելքներ  ու    հաջողություններ:

Նախարարն  իր   խոսքում   մասնավորապես  ասել   է.« Արցախի   պետական  կամերային  նվագախումբը   նախ  նոր  նրբերանգ,  ապա  նոր  որակ  հաղորդեց   արցախյան, մասնավորապես՝  մայրաքաղաքային  մշակութային  կյանքին: Անցնելով   կայացման  բավական  բարդ  ու   դժվարին ճանապարհ՝  կարճ   ժամանակամիջոցում  այն  այսօր  հասցրել  է  հանդես    գալ հրաշալի  երաժիշտների    կազմով,  որի հիմնական  մասն  արդեն արցախցի  երիտասարդ  երաժիշտներ են: Կամերային  նվագախումբը  տարիների  ընթացքում  կրթել   ու  ձևավորել   է  իր հանդիսատեսի  ճաշակը  և այսօր՝  կազմավորումից  15  տարի  անց, վայելում  է  նրա  անմնացորդ  սերը: Նվագախմբի   կայացման  գործում  անգնահատելի  է  գլխավոր  դիրիժոր Գևորգ  Մուրադյանի  դերը,   ով  ժամանակին  մեծ   խանդավառությամբ  ընդունեց  Արցախ   գալու  գաղափարը  ու նույն  ոգևորությամբ  էլ  աշխատում  է   մինչ  այսօր»:

Մեզ  հետ     զրույցում  Արցախի   պետական    կամերային  նվագախմբի  գեղարվեստական   ղեկավար  և   գլխավոր  դիրիժոր, ԱՀ   ժողովրդական  արտիստ  Գևորգ  Մուրադյանն  ասել է, որ  նվագախումբն  ստեղծվել  է  2004  թվականի   մարտի  16-ին:  Նույն  թվականի   մարտի  17-ին   նվագախմբի  տնօրեն  է  նշանակվել      արցախցի  երիտասարդ  կոմպոզիտոր, դաշնակահար, ԱՀ  արվեստի վաստակավոր  գործիչ  Սիմոն  Սարգսյանը:

«Սեպտեմբերին Արցախից  հրավեր   ստացա  և  որպես   նվագախմբի  դիրիժոր   եկա  Արցախ: Այդ  ժամանակ    ես   արտասահմանից  ևս  հրավեր  էի   ստացել, բայց  ես      նախընտրեցի գալ  Արցախ,   ու   մինչ  այսօր  էլ   չեմ  զղջում  իմ  կատարած  որոշման  համար: Ճիշտ  է,  եղել  են  դժվարություններ, խոչընդոտներ, սակայն   պետության   իրավասու  մարմինները  միշտ  էլ  մեզ  օգնել  ու  աջակցել  են, որ  մենք   կայանանք: Սկզբնական   շրջանում  նվագախմբում  ունեինք   3-4  անդամ, իսկ  այժմ՝  13:  Ժամանակի  ընթացքում   մենք  կատարելագործվեցինք,  կայացանք որպես   կոլեկտիվ   ու  դարձանք  հանդիսատեսի  կողմից  սիրելի  ու  սպասված:  Անցած  15  տարիների  ընթացքում    մենք  ունեցանք ձեռքբերումներ: Նվագախումբը   համերգներ է  կազմակերպել  ոչ  միայն  Ստեփանակերտում, ԱՀ  բոլոր   շրջաններում,   պաշտպանության  բանակի  զորամասերում, Հայաստանում, այլև,     սկսած  2012  թվականից՝  Նորվեգիայի Բերգեն  քաղաքում, Մոսկվայում, ԱՄՆ-ում՝  Լոս- Անջելեսում  և  Բոստոնում: Մենք   արտերկրում   կարողացանք   հանդես  գալ  որպես  Արցախի  պետական  կամերային  նվագախումբ  և   բեմում   բարձրացնել  Արցախի  դրոշը»,-մասնավորապես  ասել է  Գ.  Մուրադյանը:

Նա    հատուկ   շնորհակալություն  է  հայտնել   նվագախմբի  հովանավոր   «Հայ  բարեգործական  ընդհանուր  միության»     բոլոր  անդամներին,  ի  դեմս  նախագահ  Պերճ  Սեդրակյանի:

Խոսելով  առաջիկա  ծրագրերի  մասին, Գ.  Մուրադյանն  ասել  է, որ  իրենք   պատրաստվում են   մեծն   երգահան   Կոմիտասի   ծննդյան  150-ամյակին  նվիրված  համերգին:

Միջոցառմանը  նախարար   Լեռնիկ  Հովհաննիսյանն    ԱՀ  մշակույթի   բնագավառում ունեցած    արդյունավետտ   աշխատանքային  գործունեության  համար  և     Արցախի  պետական   կամերային նվագախմբի   ստեղծման  15-ամյակի  կապակցությամբ  ԱՀ  մշակույթի, երիտասարդության  հարցերի   և  զբոսաշրջության  նախարարության     պատվոգրերով   պարգևատրել  է    նվագախմբի   մի   շարք  երաժիշտների:

Միջոցառմանը  ներկա  էին  ԱՀ   նախագահ  Բակո  Սահակյանը,  ՀՀ  նախագահ  Արմեն  Սարգսյանը, Արցախի   թեմի  առաջնորդ  Պարգև  արքեպիսկոպոս  Մարտիրոսյանը, պետական   այլ այրեր,  հյուրեր  և  այլք: