ՍՏԵՓԱՆԱԿԵՐՏ, 6 ապրիլի, ԱՐՑԱԽՊՐԵՍ: Միջոցառմանը   մասնակցել են    ԱՀ  նախագահ  Բակո  Սահակյանը, պետական  այրեր, Դուշման  Վարդանի  մայրը՝ Զարիկ Ստեփանյանը, քույրը՝  Արմինեն, հարազտներ,  ընկերներ, կամավորներ:

«Արցախպրես»-ի  թղթակցի  հետ  զրույցում  Զարիկ  Ստեփանյանն  ասել է, որ  1988 թվականին   Վարդանն  ուսումը   թողել   է    կիսատ   և մեկնել  Արցախ: Նա  երազել  է, որ  ինքն առաջինն  է  մտնելու ազատագրված Շուշի և Լաչինով  տուն  է  վերադառնալու: 

«Որպես  ռազմագետ՝   որդիս  1988 թվականին    եկել  է  Արցախ և կազմավորել ջոկատներ:  Նա  մասնակցել է Արցախի   բոլոր  տարածքների   ազատագրմանը: Աշոտ  Բեկորի  հետ  ազատագրված   Շուշի  մտնող առաջիններից  մեկը  Վարդանն  էր: Կատարվել  է    որդուս  առաջին  երազանքը:  Նա  ասում  էր, ով  տիրում  է  Շուշիին, նա  տիրում է ողջ  Արցախին: Շուշիից  վերադառնալով   տուն՝  նա    փաթաթվել  է  ինձ  ու  ասել.  «Մա՛մ,  100  տարի  պիտի  ապրես,  քեզ  հուղարկավորելու   եմ   Շուշիում»,- ու  շարունակել,- «Ստեփանակերտ-Շուշիի  մայրուղու  ողջ   երկայնքով  եղրևանու   ծառեր  եմ  տնկելու»: Նա  պաշտում  էր   Շուշին: Ցավոք սրտի,  որդուս     երազանքը  կիսատ  մնաց, բայց  մենք   փորձեցինք   այն  իրականություն  դարձնել»,-մասնավորապես  ավելացրել   է   Զարիկ  մայրիկը:

Խոսելով  եղրևանիների   տնկման   նախաձեռնության  մասին՝  նա   ասել է, որ  սկսած  2016  թվականից,  սոցցանցերում  իրենք  հայտարարություն   են  տարածել, որի  նպատակն է՝  իրականացնել    Դուշման  Վարդանի  երազանքը: Շատ մարդիկ  են միացել նախաձեռնությանը, սակայն   ինչ-ինչ  պատճառներով  այն  անընդհատ   հետաձգվել  է:

 

«Այսօր  իմ  տղաներն  ու   աղջիկները  կատարում  են  իմ   որդու    երազանքը: Ես   համարում  եմ, որ  Արցախը  որդիս  է: Մենք  աշխարհին  պիտի  ապացուցենք, որ  յուրաքանչյուր  հայ  Արցախն  իրենն  է  համարում: Թո՛ղ   հայոց  արգանդը   լինի  բեղուն՝  նոր  Վարդաններ  ծնվեն,  և  թո՛ղ   հավերժ  այս  եղրևանիներն  իրենց  բույրը  տարածեն  ամենուր»,-ընդգծել   է  Զարիկ  մայրիկը:

Վարդանի  քույրը՝  Արմինե Ստեփանյանը,  վերհիշելով  եղբոր  խոսքերը,  ասել է. «Եթե   արցախցին  չպաշտպանի  իր  հողը, աշխարհն  էլ  կանգնի  չի  կարող  պաշտպանել»:

«Մենք  Արցախ  չենք  գալիս  ուղղակի  այն  տեսնելու, այլ    գալիս  ենք՝   հանդիպելու  Վարդանին:   Այսօրը  մեզ  համար  շատ  կարևոր  է, որովհետև   այսօր  մենք  իրականացրել  ենք  եղբորս՝  Վարդանի  երազանքը:  Ես  շնորհակալ  եմ  բոլոր  այն  մարդկանց, ովքեր  կյանքի  կոչեցին  այս  նախաձեռնությունը»,-նշել  է  քույրը:

ՀՀ  Ազգային  ժողովի  «Իմ  քայլը»  խմբակցության   պատգամավոր  Սոֆիա  Հովսեփյանն  էլ  մեզ   հետ զրույցում ասել է, որ, տեղեկանալով  նման   նախաձեռնության  մասին, ինքը  միանգամից պատրաստակամությունն  է  հայտնել  մասնակցել   Դուշման  Վարդանի    երազանքի  իրականացմանը:

Ս.  Հովսեփյանի  կարծիքով՝ նախաձեռնությանը     միացել  են  այն  մարդիկ,  ովքեր  գնահատում  և  կարևորում   են  ազգային  արժեքները, հերոս   հայորդիների   հայրենանվեր  արարքներն  ու  սխրանքները: