Թուրքիայի խորհրդարանի պատգամավոր Օզթյուրք Յըլմազը հայտարարել է ԱՄՆ Կոնգրեսում Հայոց ցեղասպանության ճանաչման մասին բանաձևի քննարկումը կանխելուն ուղղված քայլեր ձեռնարկելու անհրաժեշտության մասին:
Իտալիայի և Իսպանիայի իրադարձություններից հետո ԱՄՆ-ն կարող է ճանաչել Հայոց ցեղասպանությունը. թուրք պատգամավորի հայտարարությունը
ՍՏԵՓԱՆԱԿԵՐՏ, 16 ապրիլի, ԱՐՑԱԽՊՐԵՍ: Ինչպես հաղորդում է Rusarminfo-ն, թուրք պատգամավորի կարծիքով՝ Իտալիայում և Իսպանիայում Հայոց ցեղասպանության ճանաչման վերաբերյալ վերջին իրադարձություններից հետո նման բանաձևի ընդունման հավանականություն կա նաև ԱՄՆ-ում:
«Այս տարի իրավիճակը լուրջ է և տարբերվում է նախորդ տարիներից, քանի որ S-400-ների, Սիրիայի և «Ֆեթո»-ի (ընդդիմադիր միություն, որը գլխավորում է իսլամական քարոզիչ Ֆեթուլլահ Գյուլենը) հարցերով մենք և ԱՄՆ-ն ընթանում ենք տարբեր ուղղություններով», - tert.am-ի փոխանցմամբ՝ ասել է Յըլմազը թուրքական խորհրդարանում կայացած ասուլիսի ժամանակ:
Հիշեցնենք, որ ապրիլի 10-ին Իտալիայի Պատգամավորների պալատն ընդունել է նախաձեռնություն, որով կոչ է անում Իտալիայի կառավարությանը ճանաչել Հայոց ցեղասպանությունը և դրան տալ միջազգային հնչեղություն:
Ապրիլի 12-ին իսպանական Բուրգոս քաղաքի քաղաքային խորհուրդը ճանաչել է Հայոց ցեղասպանությունը:
Այս ամիս ավելի վաղ ԱՄՆ կոնգրեսական Ադամ Շիֆը (դեմոկրատ) և Հանրապետական կուսակցության անդամ Գուս Բիլիրակիսը դիմել էին Ներկայացուցիչների պալատի իրենց գործընկերներին՝ կոչ անելով միանալ Հայոց ցեղասպանության ճանաչման վերաբերյալ բանաձևի ներկայացման հարցում:
