Նախօրեին Ազգային ժողովի լիագումար նիստում 20 կողմ, 3 ձեռնպահ ձայնով առաջին ընթերցմամբ ընդունվել է «Նորմատիվ իրավական ակտերի մասին» օրենքի նախագիծը:
ԱԺ-ն առաջին ընթերցմամբ «Նորմատիվ իրավական ակտերի մասին» օրենք է ընդունել
ՍՏԵՓԱՆԱԿԵՐՏ, 18 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այն Խորհրդարանին է ներկայացրել ԱՀ արդարադատության նախարար Արարատ Դանիելյանը՝ մանրամասնելով, որ նշված օրենքի նախագծի մշակման անհրաժեշտությունը պայմանավորված է 2017 թ.-ին իրականացված սահմանադրական բարեփոխումներով: Դրանում ներառվել են ոչ միայն սահմանադրական բարեփոխումների լույսի ներքո անհրաժեշտ համապատասխանեցված իրավակարգավորումները, այլև հայեցակարգային նոր ինստիտուտներ և դրանցից բխող նոր իրավակարգավորումներ:
«Չնայած այն հանգամանքին, որ օրենքի նախագծով օրենքը վերնագրվել է նորմատիվ իրավական ակտերի մասին, սակայն այն հնարավորություն է տվել նաև անհատական և ներքին իրավական ակտերի համար ևս կիրառել նոր օրենքով սահմանված դրույթներ: Միևնույն ժամանակ նախագծով սահմանվել է նորմատիվ իրավական ակտ ընդունելու լիազորություն ունեցող մարմինների և անձանց շրջանակը՝ հիմք ընդունելով Սահմանադրությամբ ամրագրված այն մարմինների կամ անձանց շրջանակը, որոնց իրավունք է վերապահված ընդունել նորմատիվ իրավական ակտեր: Նախագծով նախատեսվում է կարգավորել նորմատիվ իրավական ակտերի նախագծերի հանրային քննարկման և կարգավորման ազդեցության գնահատման հիմնադրույթները: Նախագծով նախատեսվել է, որ 2022 թ.-ի հուլիսի 1-ից ընդունված նորմատիվ իրավական ակտերը պարտադիր կերպով հրապարակվելու են իրավական ակտերի հրապարակման պաշտոնական ինտերնետային կայքէջում, իսկ մինչ այդ նորմատիվ իրավական ակտերի պաշտոնական հրապարակումը կիրականացվի պարբերական հրատարակությունների միջոցով»,- նշել է Ա. Դանիելյանը:
Գլխադասային` պետական-իրավական հարցերի մշտական հանձնաժողովն այս օրենքի նախագծի համար տվել է դրական եզրակացություն:
