«Artsakh Young Minds»-ի և ԱՀ կրթության, գիտության և սպորտի նախարարության համատեղ նախաձեռնությամբ Ստեփանակերտի մշակույթի և երիտասարդության պալատում ընթանում է համաարցախյան ֆիզիկայի «Բրեյն-ռինգ» խաղ-մրցույթի Արցախի գավաթի եզրափակիչ փուլը:
Ստեփանակերտում ընթանում է համաարցախյան ֆիզիկայի «Բրեյն-ռինգ» խաղ-մրցույթի եզրափակիչ փուլը
ՍՏԵՓԱՆԱԿԵՐՏ, 13 մայիսի, ԱՐՑԱԽՊՐԵՍ: Եզրափակիչ փուլին մասնակցել են Ստեփանակերտի և Արցախի բոլոր շրջանների 8 թիմեր: Մրցույթին հնչել են տեսական հարցեր, որոնց մի մասն ուղեկցվել է ֆիզիկական փորձերի ճիշտ իրականացմամբ:
«Արցախպրես»-ի թղթակցի հետ զրույցում «Artsakh Young Minds»-ի ղեկավար, «Դասավանդի՛ր, Հայաստան» ծրագրի անդամ, ֆիզիկայի ուսուցիչ Արա Հարությունյանն ասել է,որ միջոցառման նպատակն է աշակերտների շրջանում ֆիզիկա առարկայի նկատմամբ մոտիվացիա և սեր առաջացնելը, ինչպես նաև ստուգելու աշակերտների ունեցած գիտելիքների մակարդակը, որը, ցավոք սրտի, շատ ցածր է:
Ըստ նրա՝ միջոցառումը լավ հնարավորություն է ոչ միայն ոգևորելու թիմերին, այլև հետաքրքիր ու տրամաբանական հարցերի շնորհիվ ստուգել նրանց ունակությունները:
Թե ինչու են աշակերտները հեռացել բնագիտական առարկաներից հարցին, մեր զրուցակիցը պատասխանել է, որ փոքր տարիքից երեխաների մոտ ծնողները հետաքրքրություն չեն առաջացնում, իսկ դպրոցում էլ ուսուցիչներն այդ առարկաների նկատմամբ սեր չեն առաջացնում աշակերտների մոտ:
Հարցի լուծման համար Ա. Հարությունյանն առաջարկել է կազմակերպել մասնագիտական կողմնորոշման մի շարք ծրագրեր, ուսուցիչներին և աշակերտներին տրամադրել խրախուսական մրցանականեր, բարձրացնել բնագիտական առարկաներ դասավանդող ուսուցիչների աշխատավարձերը, ստեղծել խիստ պահանջկոտ հանձնաժողով, որը հետևողական կլինի նրանց կողմից տարվող աշխատանքներին:
ԱՀ կրթության, գիտության և սպորտի փոխնախարար, մրցույթի ժյուրիի նախագահ Միքայել Համբարձումյանն էլ մեզ հետ զրույցում ասել է, որ նման միջոցառումները խթան են հանդիսանում, որ աշակերտների մոտ բնագիտական առարկաների նկատմամբ հետաքրքրություններ առաջանան:
«ԱՀ ԿԳՍ նախարարության կողմից քիմիա, ֆիզիկա և մաթեմատիկա առարկաներից ունենք «Կնունյանցի», «Իոսիֆյանի» և «Մերգելյանի» անվան կրթաթոշակներ, որոնց արժանանում են այն աշակերտները, ովքեր օլիմպիադայում այդ առարկաներից ապահովում են բարձր ցուցանիշներ: Ուշադրության կենտրոնում են նաև այս առարկաների ուսուցիչները, որոնց համար այս տարի կազմակերպվել են վերապատրաստման դասընթացներ»,-մասնավորապես ասել է Մ. Համբարձումյանը:
