Այսօր Խորհրդարանում կայացել է ԱԺ արտաքին հարաբերությունների և ֆինանսաբյուջետային ու տնտեսական կառավարման հարցերի մշտական հանձնաժողովների համատեղ նիստը:
ԱԺ-ում կայացել է արտաքին հարաբերությունների և ֆինանսաբյուջետային ու տնտեսական կառավարման հարցերի մշտական հանձնաժողովների համատեղ նիստը
ՍՏԵՓԱՆԱԿԵՐՏ, 21 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նիստին ներկայացվել է ԱՀ 2018թ.-ի պետական բյուջեի կատարման տարեկան հաշվետվությունը:
Մասնավորապես՝ Խորհրդարանը քննարկել է արտաքին գործերի նախարարության, զբոսաշրջության, հանրային հեռուստառադիոընկերության և «Ազատ Արցախ» հանրապետական թերթի տարեկան հաշվետվությունը:
ԱՀ արտաքին գործերի նախարար Մասիս Մայիլյանի խոսքով՝ գերատեսչության 2018 թ.-ի պահպանման ծախսերի նախահաշիվը կազմել է 783 միլիոն դրամ, փաստացի ծախսվել է 681 միլիոն դրամ, ինչը կազմում է նախատեսվածի 86.9 %-ը: ԱՀ կառավարության որոշումների համաձայն՝ ԱԳՆ-ին լրացուցիչ հատկացված գումարը կազմել է 54 միլիոն 771 հազար դրամ, այդ թվում՝ արտասահմանյան պաշոտանական գործուղումների համար հատկացվել է 33 միլիոն 386 հազար դրամ և պահուստային ֆոնդին՝ 21 միլիոն 385 հազար դրամ:
Նախարարի խոսքով՝ գերատեսչությունում գործում են մշատական ներկայացուցչություններ, որոնց ծախսերը կազմել են 448 միլիոն 382 հազար դրամ, ինչը ընդհանուր ծախսերի 57.1 %-ն է կազմում:
Անդրադառնալով զբոսաշրջության ոլորտին՝ ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը նշել է, որ զբոսաշրջության զարգացման համար 2018 թ.-ին նախատեսված է եղել 25 միլիոն դրամ: Իրականացվել են մի շարք ծրագրեր, այդ թվում՝ մասնակցություն ՀՀ-ում տեղի ունեցող միջոցառումներին՝ 1 միլիոն դրամ, հրատարակչական աշխատանքներ՝ 2 միլիոն դրամ, ուղեցույց-ցուցանակների տեղադրում և սպասարկում՝ 1 միլիոն դրամ և այլն:
Ի դեպ, անցած տարում Արցախը մասնակցել է նաև միջազգային մի շարք զբոսաշրջային ցուցահանդեսների, մասնավորապես՝ հունվարի 17-21-ը՝ Մադրիդում, մարտի 12-14-ը՝ Մոսկվայի միջազգային տուրիզմի և ճամփորդություն ցուցահանդեսին, ապրիլի 20-22-ը՝ Ինտուր էքսպո ցուցահանդեսին, մայիսի 10-12-ը՝ Երևանի գինու օրերին և նոյեմբերի 5-7-ը՝ Լոնդոնում կայացած ցուցահանդեսին:
Լ. Հովհաննիսյանի խոսքով՝ եթե տարեվերջի դրությամբ ունեինք 64 հյուրանոցային տնտեսություն` 1532 մահճակալով, ապա այսօր ունենք մոտ 75 հյուրանոց և զբոսաշրջային տուն՝ 1745 մահճակալով:
Ներկայացնելով ԱՀ Հանրային հեռուստառադիոընկերության ծախսերը՝ խորհրդի նախագահ Արսեն Առստամյանն ասել է, որ հատկացված 27 միլիոն 960 հազար 600 դրամ գումարից փաստացի ծախսել է 25 միլիոն 416 հազար 100 դրամ: Բացի դրանից, հանրային հեռուստառադիոընկերության խորհուրդը 2018 թ.-ին ԱՀ պետական բյուջեով հատկացված հեռուստատեսային և ռադիոծառայություններ ֆինանսավորվող ծրագրով ստացել և ԱՀ Հանրային Հեռուստառադիոընկերություն ՓԲԸ-ին է փոխանցել 387 միլիոն 344 հազար դրամ, կատարողականը՝ 100%:
Անդրադառնալով նոր եթերաշրջանին՝ Ա. Առստամյանն ասել է, որ այսօր ունենք ութժամյա եթեր: Չնայած 2019 թ.-ին պետական բյուջեում հատկացված գումարներում փոփոխություններ չեն կատարվել, սակայն, ըստ Ա. Առստամյանի, ընդհանուր առմամբ, որոշակի փոփոխություններ են կատարվել բյուջեի հոդվածային մասում, եղել են նաև հաստիքակառուցվածքային փոփոխություններ: Օպտիմալացում առայժմ չի կատարվել:
Իր հերթին «Ազատ Արցախ» հանրապետական թերթի գլխավոր խմբագիր Նորեկ Գասպարյանն ասել է, որ հատկացվել էր 86 միլիոն 120 հազար դրամ: Տարվա ընթացքում տպագրվել է 150 համար հայերեն և 51 համար ռուսերեն: Ընդհանուր օրինակների քանակը 82 հազար է: Եկամուտներ ստացվում են նաև գովազդներից և հայտարարություններից, ինչպես նաև թերթերի բաժանորդագրություններից, սակայն, ըստ Ն. Գասպարյանի. թերթի բաժանորդագրությունից ստացված եկամուտները բավարար չեն, քանի որ բաժանորդագրությունը բավականին ցածր է:
Նիստին պատգամավորների կողմից բարձրացվել են մի շարք հարցեր:
