ՍՏԵՓԱՆԱԿԵՐՏ, 24 մայիսի, ԱՐՑԱԽՊՐԵՍ: «Արցախպրես»-ի  թղթակցի  հաղորդմամբ՝   տոնական    տրամադրություն  էր  նաև   Ստեփանակերտի  Խաչատուր  Աբովյանի  անվան  N1    հիմնական  դպրոցում, որտեղ   կրթօջախին  հրաժեշտ  են  տվել   143   շրջանավարտ:

Միջոցառմանը   դպրոցի   աշակերտները   հանդես  են  եկել  երգերով  ու  պարերով, զինվորական  ներկայացում-ցուցադրությամբ:

Դպրոցի  տնօրեն  Ժաննա   Բալայանը  մի  խումբ   աշակերտների՝  տարբեր  մրցույթներում    ցուցաբերած  ակտիվության  և  առաջադիմության  համար    հանձնել է  գովասանագրեր  և  շնորհակալագրեր:

«Վերջին զանգը»-ին      շնորհավորական      խոսքով  հանդես  է  եկել  ԱՀ  կրթության, գիտության  և  սպորտի  նախարար  Նարինե  Աղաբալյանը:

Նա ասել է, որ   դպրոցական  զանգը  վերջին անգամ   ղողանջել   է   1340    12-րդ  դասարանի        աշակերտի  համար, իսկ  1968    իններորդցիների  համար  էլ    այդ  զանգը   խորհրդանշում   է    որպես  հիմնական  կրթության  վկայության ավարտ:

Նախարարը  նշել է, որ  12-րդ  դասարանն  ավարտած    տղաներից  շատերն առաջիկայում  կզորակոչվեն   և  կհամալրեն  պաշտպանության  բանակի   շարքերը, իսկ  իններորդ  դասարանն  ավարտած     աշակերտները   պիտի  շարունակեն   իրենց ուսումն ավագ  կամ  միջին մասնագիտական   հաստատություններում:

Դիմելով   շրջանավարտներին՝  Ն.  Աղաբալյանը  մասնավորապես  ասել է. «Ձեզ  համար  սկսվում  է կյանքի   նոր  փուլ՝  ավելի  հասուն  և  ուղղորդված: Առաջիկա   3  տարիները   լինելու  են  նոր  գիտելիքների, հմտությունների  ձեռքբերման   և    մասնագիտական  կողմնորոշման տարիներ:   Այդ  տարիների  ընթացքում   դուք  պետք  է  ընտրեք կյանքի  կարևոր    որոշումներից  մեկը՝  ձեր ապագա  մասնագիտությունը:  Հիշեք, որ  դուք  եք  անկախության  սերունդը, և  դուք  եք  մարմնավորում  մեր  անկախությունը  կերտածների    նվիրական     երազնքները, Ձեզ  հետ  են  կապված  մեր  բոլոր  հույսերը՝  միասնության,   հզոր  հայրենիքի  և  նոր  հաղթանակների  տեսլականը: Վստահ  քայլեք  ձեր   ճանապարհը, եղեք   հավատարիմ  այն  արժեքներին, որոնք  անսասան  կպահեն  մեր    հայրենիքը  և  մեր   պետականությունը: Մաղթում եմ   ձեզ  լուսավոր   ճանապարհ: Շնորհակալություն  եմ  հայտնում  բոլոր  ուսուցիչներին   իրենց  նվիրական  առաքելության  համար»:

Ստեփանակերտի N1  հիմնական  դպրոցի   տնօրեն  Ժաննա   Բալայանը   ևս  շնորհավորել  է    շրջանավարտներին:

Նա   իր  խոսքում   նշել  է. «Իններորդցիների  համար    այս  միջոցառումը  հարազատ  դպրոցի  գրկում վերջինն  է:  Առջևում  չորրորդ  և իններորդ  դասարանցիների  գիտելիքների  ստուգման  համար ավարտական  քննություններ  հանձնելն   է:  Մաղթում  եմ, որ  հաջողությամբ  ավարտեք   քննաշրջանը  և  ճիշտ  քայլերով   մտնեք  նոր  կյանք: Ցանկանում եմ, որ  ձեր  կյանքի  յուրաքանչյուր  օրն  իմաստավորված ու  հետաքրքիր  լինի,  և որ  ձեր  կողքին  միշտ  հավատարիմ  և ուղղամիտ    մարդիկ  լինեն: Եղեք  նախաձեռնող  ու  համարձակ,  ձեր  ունեցած  գիտելիքներով  ու  վարպետությամբ   շենացրեք  մեր  հայրենիքը ու   դարձեք  նրա   արժանի  զավակները»:

Արարողությանը  դպրոցի    շրջանավարտ  Անահիտ  Ղահրամանյանն   իններորդցիների  անունից   շնորհակալություն   է հայտնել      կրթօջախի  ուսուցիչներին՝   նրանց   հայրենասիրության  և  այն  ջերմության  համար, որ  ամեն  օր  փոխանցում  են  աշակերտներին:

«Մեր ուսուցիչները  և  դպրոցի  տնօրենն    ամեն   օր  մեծ   պատասխանատվությամբ  են  մոտենում   իրենց  գործին՝  մանկավարժի    բարձր  կոչմանը, նրանց  գիտելիքները, ստեղծագործական   ողջ  ներուժն  ու  ոգու    ջերմությունը  նվիրելով  երեխաների  դաստիարակության   ու   կրթության  վեհ   գործին»,-ավելացրել է  Ա. Ղահրամանյանը:

Միջոցառմանը  ներկա  էին  ԱՀ   նախագահ  Բակո  Սահակյանը` տիկնոջ Անահիտ Սահակյանի հետ, ԱՀ  ԿԳՍ  նախարարության  աշխատակիցներ,  շրջանավարտների  ծնողներ,  հարազատներ    և  այլք: