Այսօր՝ մայիսի 25-ին, «Եզնիկ Մոզյան կրթահամալիր»-ի և «Էկովիլ» արևային տեխնոլոգիաների ընկերության միջև ստորագրվել է համաձայնագիր:
«Եզնիկ Մոզյան կրթահամալիր»-ի և «Էկովիլ» ընկերության միջև ստորագրվել է համաձայնագիր
ՍՏԵՓԱՆԱԿԵՐՏ, 25 մայիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Եզնիկ Մոզյան կրթահամալիր»-ի գործադիր տնօրեն Վասպուրակ Կարապետյանն ասել է, որ ակնկալում են նոր հնարավորությունների ստեղծում, որի արդյունքում կկարողանան ավելի բարձր մակարդակի հասցնել վերականգնվող էներգետիկայի ոլորտի, մասնավորապես՝ էներգետիկայի ոլորտի մասնագետների թե՛ պատրաստումը և՛ թե վերապատրաստումը:
«Մինչ համաձայնագրի ստորագրումը մենք համագործակցել ենք Տավուշի մարզում, իրականացրել որոշ ծրագրեր, որին մասնակցել են թե՛ մեր վարպետները և թե՛ մեր աշկերտները: Քանի որ համագործակցությունն անցել է հաջող, և մեզ համար տեսանելի էր պոտենցիալը, որոշեցինք համագործակցությանը տալ համաձայնագրի տեսք»,- նշել է Վ. Կարապետյանը:
Իր հերթին «Էկովիլ» արևային տեխնոլոգիաների ընկերության հիմնադիր տնօրեն Տիգրան Օխանյանն ասել է, որ ընկերությունն արդեն մի քանի տարի է, ինչ զբաղվում է վերականգնվող էներգետիկայի, մասնավորապես՝ արևային ջերմային համակարգերի և արևային հոսանքի ֆոտովոլտային համակարգերի տեղադրմամբ ու սպասարկմամբ:
«Կազմակերպությունն ունի ավելի հին փորձ հիդրոէներգետիկայի ոլորտում: Մի քանի տարվա մեջ դարձել ենք հայաստանյան շուկայում առաջատար ընկերություններից մեկը: Ներկայումս իրականացնում ենք բավականին լուրջ նախագծեր և մեծ հույսեր ենք կապում ոլորտի զարգացման հետ: Հաշվի առնելով արևային էներգիայի ռեսուրսի հարստությունը Արցախում և կառավարության խթանիչ քաղաքականությունը՝ որոշեցինք համագործակցել կրթահամալիրի հետ, քանի որ տեղյակ ենք կրթահամալիրի ունեցած բարի համբավի մասին, ինչպես նաև իրազեկված ենք հաստատության բարձր տեխնիկական պատրաստվածության մասին: Ունենք վստահություն, որ, մեր կարողությունները ներդնելով, ինչպես նաև նրանց մասնագիտական փորձը հաշվի առնելով, կարող ենք սպասարկել որակյալ համակարգեր՝ բավարարելով բնակչության որոշ պահանջները»,- ավելացրել է Տ. Օխանյանը:
