Ստեփանակերտի մշակույթի և երիտասարդության պալատում այսօր կայացել է CONIFA Sportsbet.io European Football Cup 2019-ին անդամագրված կամավորականների պարգևատրման արարողություն:
Ստեփանակերտում տեղի է ունեցել CONIFA-2019-ին անդամագրված կամավորականների պարգևատրման արարողություն
ՍՏԵՓԱՆԱԿԵՐՏ, 9 հունիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ նախագահ Բակո Սահակյանը:
Նա կարևորել է կամավորականների կողմից բարձր մակարդակով իրականացվող աշխատանքները:
Միջոցառմանը մասնակից ԱՀ կրթության, գիտության և սպորտի նախարար Նարինե Աղաբալյանի խոսքով՝ երբ իրենք սկսկել են կամավորական շարժումը, իրենց լավ չէին պատկերացնում աշխատանքի բնույթը, քանի որ նման կարգի միջոցառումներ անցկացնելու փորձառություն չունեին:
«Վստահ էինք, որ մեզ սպասվում է հետաքրքիր աշխատանք: Դատելով արձագանքներից՝ մենք հասկացանք, որ կամավորական աշխատանքները պետք է լինեն շարունակական: Ֆուտբոլային իրադարձությունը լավ հնարավորություն էր ներկայացնելու Արցախը: Մենք պատահական չենք ընտրել ConiFA-2019-ի խորհրդանիշը՝ թոռնիկը, որովհետև ուզում էինք ցույց տալ, որ Արցախում ապրում է նոր սերունդ, որը շատ ազատ է, համարձակ և պատրաստ է նոր հաջողությունների և հաղթանակների գրանցման: Կամավորականները ևս հենց այդ նոր սերնդն է իր ողջ հմայքով ու կարողություններով: Այս միջոցառումը կարևորում եմ նրանով, որ կամավորականներն իրենց մեջ նոր կարողություններ ու հմտություններ բացահայտեցին: Այս օրերին մեր հանրային կյանքում ձևավորվեց կամավորների համայնք, որը անպայման դրական ազդեցություն է ունենալու Արցախում, և նրանց ներկայությունը միշտ տեսանելի է լինելու»,-մասնավորապես ասել է նախարարը:
Նա հատուկ շնորհակալություն է հայտնել ԱՀ նախագահին, CONIFA-2019-ի կամավորականների խմբի ղեկավար Ղազար Հակոբյանին, կամավորականներին՝ նման բարձր մակարդակով աշխատանքներ կազմակերպելու համար:
ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանն էլ ասել է, որ կամավորականները հաջող են իրականացրել աշխատանքը:
Նրա խոսքով՝ կամավորականներն իրենց մասնակից թիմերի հետ, ինչպես նաև մարզադաշտերում և մշակութային միջոցառումների ժամանակ իրականացրել են պատասխանատու աշխատանքներ:
«Համոզված եմ, որ CONIFA-2019-ին անդամագրված 270 կամավորականները նույն ակտիվությամբ մասնակցելու են համահայկական խաղերին, և իրենց առջև դրված առաջադրանքը նույնպես պատվով կկատարեն»,-ավելացրել է Լ. Հովհաննիսյանը:
ConiFA-2019-ի կամավորական խմբի ղեկավար Ղազար Հակոբյանը ևս կարևորել է Արցախում նման աշխուժություն և նոր շունչ մտցնելը:
Նա շնորհակալություն է հայտնել բոլոր կամավորականներին՝ նվիրված, անկեղծ ու համախմբված համատեղ աշխատանքների համար, և նշել, որ այն անհրաժետ է պահպանել ու էլ ավելի զարգացնել:
Ելույթներից հետո ConiFA-2019-ին կամավորական սկզբունքով
անդամագրվածներին, նրանց ղեկավար Ղազար Հակոբյանին, ակտիվ աշխատանքների համար ԱՀ ԿԳՍ և ԱՀ մշակույթի, երիտասարդւթյան հարցերի և զբոսաշրջության նախարարությունների կողմից հանձնվել են շնորհակալագրեր:
Միջոցառմանը ներկա էին նաև պետական այրեր, ԱՀ ֆուտբոլի ֆեդերացիայի նախագահ Սամվել Կարապետյանը, կամավորականներ և այլք:
