ՍՏԵՓԱՆԱԿԵՐՏ, 10 հուլիսի, ԱՐՑԱԽՊՐԵՍ-ՄԱՐՏԻԿ: Տարածաշրջանում ստեղծված ռազմաքաղաքական իրողություններն ու հակառակորդի ռազմատենչ հռետորաբանությունն իրենց հերթին ստիպում են անընդհատ զարգացնել ձեռքբերումները, նոր մեթոդներ մշակել՝  և' պաշտպանողական, և' հարձակողական գործողություններին մշտապես կազմ ու պատրաստ լինելու համար:

Վերոնշյալ հանգամանքների հաշվառումով էր կազմակերպվել նաև գնդապետ Աշոտ Աղաջանյանի հրամանատարությամբ գործող զորամասի ստորաբաժանումներից մեկի ուժեղացված կազմով անցկացված մարտական հրաձգությամբ մարտավարական զորավարժությունը, որի ընթացքում խաղարկվեցին ինչպես պաշտպանողական, այնպես էլ հարձակողական բնույթի գործողություններ:

Հարձակման անցած պայմանական հակառակորդի ուժերի դեմ մարտի են ելնում Ռոբերտ Համբարձումյանի հրամանատարությամբ գործող ստորաբաժանման զինծառայողները: Նախքան զորախաղերի մեկնարկը, որի մարտական հրաձգության փուլին, բացի միավորման հրամկազմից, հետևել է նաև պաշտպանության նախարար, ՊԲ հրամանատար, գեներալ-մայոր Կարեն Աբրահամյանը, ստորաբաժանումը բերվել է բարձր մարտական պատրաստականության աստիճանի և սահմանված ժամանակացույցում, համաձայն մարտական հաշվարկների, զբաղեցրել ծավալման շրջանները:

Կազմակերպելով զբաղեցրած շրջանի պաշտպանությունը և կասեցնելով մխրճված հակառակորդի հետագա առաջխաղացումը` ենթակա ստորաբաժանումները զեկուցել են ընդհանուր իրադրությունը, պայմանական հակառակորդի գործողությունները և իրավիճակից բխող այլ մանրամասներ:

Այնուհետև վերախմբավորելով ուժերը և ստանալով համապատասխան աջակցություն` իրականացվել է հակառակորդի կենդանի ուժի և զինտեխնիկայի խոցում, հակագրոհի կազմակերպում և, օգտագործելով նաև արդիական տեխնիկական միջոցներ ու նորարարական լուծումներ, վերականգնվել է առաջնագիծը:

«Խաղարկված պլանի համաձայն` հակառակորդի ուժերը ներխուժել են մեր առաջնագիծ: Խնդիր ունենալով կասեցնել նրանց հետագա առաջխաղացումը` համապատասխան ազդանշանի համաձայն ստորաբաժանումը դուրս է եկել տեղակայման վայրից, անցել պաշտպանության, վերախմբավորել ուժերը և, ստանալով համապատասխան աջակցություն, վերականգնել կորցրած դիրքերը:

Ինչպես պաշտպանության կազմակերպման, այնպես էլ հակագրոհի ժամանակ անձնակազմը իրեն դրսևորել է ուսուցմանը համապատասխան: Բնականաբար նման զորավարժությունները կարևորվում են հենց դրանով, որպեսզի զինծառայողները ուսուցման ընթացքում ստացած գիտելիքները կարողանան կիրառել և ավելի կատարելագործեն իրենց ունակությունները»,- մեզ հետ զրույցում ասաց ստորաբաժանման հրամանատար, մայոր Ռոբերտ Համբարձումյանը, շեշտելով, որ իրական մարտական գործողությունների դեպքում անձնակազմը պատրաստ է նույն ձևով իրականացնել առաջադրված խնդիրները:

«Իմ ջոկը խնդիր է ստացել ոչնչացնել հակառակորդի կենդանի ուժն ու տեխնիկական միջոցները և մյուս ստորաբաժանումների հետ համատեղ վերականգնել կորցրած դիրքերը, որը մենք կատարել ենք սահմանված կարգի համաձայն:

Ինչ վերաբերում է անհրաժեշտությանը, ապա պետք է ասել, որ նման պարապմունքները հնարավորություն են տալիս գործնականորեն պատրաստվել սպասվող մարտական գործողություններին: Ես վստահ եմ, որ այդ դեպքում ևս անձնակազմը կկարողանա պատվով կատարել իր առաքելությունը:

Ավելին, եթե հիմա մտածում ենք, որ սա պարապմունք է և կարող է ինչ-որ բան այնպես չանենք, ինչպես հարկն է, և դա լուրջ հետևանք չի ունենա, ապա իրական պայմաններում ավելի վստահաբար կկատարենք մեր խնդիրները»,- մեզ հետ զրույցում վստահեցրեց ջոկի հրամանատար, սերժանտ Գևորգ Խաչատրյանը:

Ինչպես բուն զորախաղերի, այնպես էլ դրան նախորդած մարտավարաշարային պարապմունքների ընթացքում անձնակազմի ցուցաբերած հստակ ու ներդաշնակ գործողությունները թույլ են տալիս վստահություն հայտնելու, որ բացի տեսական գիտելիքներից, զինծառայողներն ունեն նաև մասնագիտական անհրաժեշտ հմտություններ և պատրաստ են ոչ միայն զորավարժությունների, այլև, եթե պետք լինի, իրական մարտական պայմաններում ցույց տալ իրենց բազկի ուժը և անառիկ պահել հայրենիքի սահմանները: