«Awesome Artsakh» հիմնադրամի ֆինանսավորմամբ՝ Ստեփանակերտի ազատամարտիկների պուրակում այսօր կայացել է մայրաքաղաքի Վիտալի Ջհանգիրյանի անվան N 11 ավագ դպրոցի 11-րդ դասարանի աշակերտուհի Աննա Բաղդասարյանի «ժպտացող քաղաքի մայթային էթիկետ» ծրագրի շնորհանդեսը:
Ստեփանակերտում կայացել է «Ժպտացող քաղաքի մայթային էթիկետ» ծրագրի շնորհանդեսը
ՍՏԵՓԱՆԱԿԵՐՏ, 12 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Աննա Բաղդասարյանն ասել է, որ իր ծրագիրն իրականացնելու համար իրեն օգնել են նաև ընկերները:
Ծրագիրը էթիկետային-դաստիարակչական նպատակ ունի: Մայթային ցուցանակների վրա գրաֆիկական դիզայնով արված նկարներն ու գրություններն արտահայտում են կոնկրետ իրավիճակ և հորդոր: Ցուցանակների գրությունները գրված են գրական հայերենով, Արցախի բարբառով և անգլերենով:
Պատրաստած 45 ցուցանակներից 15-ը տեղադրվել է ազատամարտիկների այգում, 15-ը Ստեփան Շահումյանի անվան օղակաձև պուրակում և 15-ն էլ Ազատամարտիկներ փողոցի երկայնքով:
Ըստ Ա. Բաղդասարյանի՝ ծրագրի նպատակը նաև հասարակությանը ժպիտ և տրամադրություն հաղորդելն է:
Խոսելով ծրագրի անվանման մասին՝ մեր զորւցակիցը մասնավորապես ասել է. «Ստեփանակերտն ինձ համար նման է լուսավոր ժպիտի: «Մայթային էթիկետ» քանի որ նույնիսկ Google որոնողական համակարգում մենք շատ դժվարությամբ կարող ենք համապարփակ ուսումնասիորւթյուն գտնել թեմայի մասին: Շատերի խոսքով՝ Ստեփանակերտը մաքուր քաղաք է, իսկ ես այդպես չեմ կարծում, որովհետև ապրելով այստեղ՝ թերություններն ավելի լավ եմ նկատում, որոնք շտկելու համար էլ նախաձեռնել եմ այս ծրագիրը»:
Շնորհանդեսն ուղեկցվել է կիթառի և թավջութակի գեղեցիկ կատարումներով:
