Կայացել է «Ընտանեկան ճամբար-2019»-ի փակման արարողությունը. մասնակիցներն արժանացել են անակնկալ նվերների
ԱՀ մշակույթի, երիտասարդության հարցերի և զբոսաշրջության նախարարության նախաձեռնությամբ և ԱՀ պետական գերատեսչությունների և մասնավոր մի շարք ընկերությունների համատեղ աջակցությամբ Ասկերանի շրջանի Պատարա գյուղում կայացել է «Երջանիկ ենք միասին» խորագրով եռօրյա «Ընտանեկան ճամբար-2019»-ի փակման արարողությունը:
Կայացել է «Ընտանեկան ճամբար-2019»-ի փակման արարողությունը. մասնակիցներն արժանացել են անակնկալ նվերների
ՍՏԵՓԱՆԱԿԵՐՏ, 19 հուլիսի, ԱՐՑԱԽՊՐԵՍ: Ճամբարային ծրագրի ընթացքում մասնակից 25 ընտանիքները հնարավորություն են ունեցել արցախյան գեղատեսիլ բնության գրկում միասին անցկացնել ազգային-ավանդական, մարզատուրիստական, մշակութային մրցույթներով, հետաքրքրիր հանդիպումներով և ծանոթություններով հագեցված օրեր:
«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը:
Նա նշել է, որ տեղեկատվական տեխոնոլոգիաների դարաշրջանում մարդկային շփումները կարծես որոշ չափով հետ են մղվում: Նման միջոցառումների իրականացումը հնարավորություն է տալիս մարդկանց, որ արցախյան ընտանիքներն իրար հետ մտերմանան ու բարեկամանան:
«Հայտնի ճշմարտություն է, որ ամուր ընտանիքն ազգի հիմքն է: Հայ ընտանիքը հազարամյա փորձություն է անցել՝ պահելով իր ազգային նկարագիրն ու էությունը: Նման ընտանիքների շնորհիվ է, որ հաղթահարել ենք դժվարություններ»,-ավելացրել է նախարարը:
Միջոցառմանը ներկա ԱՀ Ազգային ժողովի նախագահ Աշոտ Ղուլյանի խոսքով՝ ճամբարը Արցախի տարբեր շրջաններում ապրող երիտասարդ ընտանիքներին հնարավորություն է տալիս համախմբվելու և բարեկամանալու:
ԱՀ կրթության, գիտության և սպորտի նախարար Նարինե Աղաբալյանն էլ ասել է, որ ի սկզբանե «Ընտանեկան ճամբար»-ի գաղափարական հիմքում դրված էր ընտանեկան արժեքների պահպանումը:
«Այն փաստը, որ ամեն տարի ընդլայնվում է ճամբարին մասնակից ընտանիքների և ծրագրի կազմակերպման աջակիցների թիվը, կարծում եմ, վկայում է այն մասին, որ ծրագիրը պետք է շարունակական լինի»,-նշել է Ն. Աղաբալյանը:
Մեզ հետ զրույցում ԱՀ մշակույթի, երիտասարդության հարցերի և զբոսաշրջության փոխնախարար Գայանե Գրիգորյանն էէլ ասել է, որ արդեն 10-րդ տարին է, ինչ իրենց կողմից կազմակերպվում է «Ընտանեկան ճամբար»:
«Ճամբարային առաջին ծրագրին մասնակցել է 7 ընտանիք, և այսօր մենք նկատելի աճ ենք տեսնում, որն էլ հաստատում է ծրագրի հաջողության և կայացման մասին: Այս անգամ նախատեսել ենք 16 ընտանիքի մասնակից անել, սակայն հայտագրվել է 26-ը. նրանց հայտերը չեն մերժվել նախարարության կողմից: Մեր նպատակն է ևս մեկ անգամ արժևորել ընտանիքի դերը և քարոզել ավանդական ընտանիքների արժեքները»,- մասնավորապես ասել է Գ. Գրիգորյանը:
Միջոցառման վերջում ճամբարին մասնակից բոլոր թիմերը ծրագրի հովանավորների կողմից արժանացել են թանկարժեք նվերների, գումարի, ամառային հանգիստն անցկացնելու հմար տուրիստական փաթեթների, ինչպես նաև ԱՀ մշակույթի, երիտասարդության հարցերի և զբոսաշրջության նախարարության կողմից շնորհակալագրերի:
Առաջին մրցանակային տեղ գրաված Ռոբերտ և Վիկտորյա Պողոսյանների ընտանիքն առաջին անգամ են մասնակցել «Ընտանեկան ճամբար»-ին:
Շնորհակալություն հայտնելով ճամբարի կազմակերպիչներին և հովանավորներին Ռոբերտ Պողոսյանն ասել է. «Մինչ այս մենք մասնակցել ենք «Լավագույն մարզական ընտանիք» մրցույթին ու գրավել ենք առաջին տեղը: Այս ճամբարում ևս ցանկացանք փորձել մեր ներուժը: Մենք կարևորում ենք ընկերակցության մթնոլորտը, նոր ընտանիքների հետ ծանոթացումը, ինչպես նաև բնության գրկում հաճելի հանգիստ անցկացնելը»:
Վիկտորյա Պողոսյանի խոսքով՝ իրենց համար մեծ հպարտություն և ուրախություն է, որ այս անգամ ևս կարողացան գրավել առաջին մրցանակային տեղը:
«Մենք ձեռք բերեցինք նոր ընկերներ, որոնց հետ կշարունակենք ստեղծել ընտանեկան ջերմ հարաբերություններ»,-ասել է Վ. Պողոսյանը:
Ճամբարի հովանավորներից՝ ԱՀ «Ազատ Հայրենիք» կուսակցության նախագահ Արայիկ Հարությունյանի աջակցությամբ առաջին տեղ գրաված Պողոսյանների ընտանիքը հնարավորություն է ստացել ամառային յոթօրյա հանգիստն անցկացնել Ռուսատանի Դաշնության Գելենջիկ քաղաքում:
11-րդ տեղ գրաված ասկերանցի Վլադիմիր և Նոյեմ Հակոբջանյանները «Վարանդա Թրավել» տուրիստական գործակալության կողմից արժանացել են փաթեթի՝ Ծաղկաձորում հանգստանալու համար:
Նրանք իրենց գոհունակությունն են հայտնել ճամբարի կազմակերպիչներին և հովանավորներին: