ԱՀ նախագահ Բակո Սահակյանի հետ հանդիպմանը քննարկել ենք մի շարք հարցեր, որոնք կապված են Արցախի միջազգային ճանաչելիության և ժողովրդավարության զարգացման գործընթացների հետ:
Արցախի՝ միջազգայնորեն չճանաչված լինելու պատճառը չի կարող որևէ նշանակություն ունենալ մարդու իրավունքների տեսանկյունից. Արման Թաթոյան
ՍՏԵՓԱՆԱԿԵՐՏ, 31 հուլիսի, ԱՐՑԱԽՊՐԵՍ: ԱՀ նախագահի հետ հանդիպումից հետո այս մասին «Արցախպրես»-ի թղթակցի հետ զրույցում ասել է ՀՀ մարդու իրավունքների պաշտպան Արման Թաթոյանը:
Ա. Թաթոյանի խոսքով՝ միջազգային ասպարեզում աշխատելու համար կարևոր է տվյալ տարածքի քաղաքական կարգավիճակը:
«Արցախի՝ միջազգայնորեն չճանաչված լինելու պատճառը չի կարող որևէ նշանակություն ունենալ մարդու իրավունքների տեսանկյունից, որովհետև մենք պետք է նկատի ունենանք, որ մարդու իրավունքներն էլ համընդհանուր կարգեր են: Երկրի չճանաչվածությունը երբեք չպետք է պատճառ հանդիսանա երեխաների, կանանց, հաշմանդամություն ունեցող անձանց իրավունքների ոչ պատշաճ պաշտպանվածության խնդիրներին: Արցախի բնակիչն ինքն օբյեկտիվորեն չունի այն միջազգային կառույցների աջակցությունը, որոնք ունեն ճանաչված պետությունները: Մենք պետք է մշտապես խրախուսենք միջազգային փորձագետների այցերն Արցախ: Այս սկզբունքներով ես նաև աշխատում եմ միջազգային ասպարեզում: Արցախը վավերացրել և միակողմանիորեն միացել է մարդու իրավունքների միջազգային մի շարք պայմանագրերի»,-մասնավորապես ասել է Ա. Թաթոյանը՝ նշելով, որ ՀՀ և ԱՀ մարդու իրավունքների պաշտպանների համագործակցությունն ինքը համարում է արդյունավետ:
Ըստ մեր զրուցակցի՝ մարդու իրավունքների պաշտպանության գործում կարևոր է նաև Սփյուռքի դերն ու աջակցությունը:
«Կարծում եմ՝ Հայաստան-Արցախ-Սփյուռք եռամիասնության համատեղ աշխատանքի արդյունքում է հնարավոր լուրջ արդյունքների հասնել»,-ավելացրել է Ա. Թաթոյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -55-:
