Արցախի Հանրապետության մշակույթի, երիտասարդության հարցերի և զբոսաշրջության նախարարության նախաձեռնությամբ և «Շուշի քաղաքի թանգարաններ» ՊՈԱԿ-ի ու Արցախի պետական պատմաերկրագիտական թանգարանի մասնակցությամբ այսօր՝ սեպտեմբերի 2-ին, Ստեփանակերտի Ստեփան Շահումյանի անվան օղակաձև պուրակում կազմակերպվել է պլեներային նկարչության, գորգերի, կարպետների և գրքերի ցուցահանդես՝ նվիրված ԱՀ հռչակման 28-րդ տարեդարձին:
Մայրաքաղաքում կազմակերպվել է ցուցահանդես՝ նվիրված ԱՀ հռչակման 28-րդ տարեդարձին
ՍՏԵՓԱՆԱԿԵՐՏ, 2 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Շուշի քաղաքի թանգարաններ» ՊՈԱԿ-ի տնօրեն Լուսինե Գասպարյանն ասել է, որ իր կարծիքով ազատության այլընտրանքն անկախությունն է և հենց այդ խորագիրն է ընկած պլեներային նկարչության հիմքում:
«Մասնագիտությամբ արվեստաբան եմ և սիրով եմ լծվել այս աշխատանքին: Երեխաներին կտրամադրվեն նկարչանյութեր և նրանց հետ կաշխատեն նկարիչներ: Գույների միջոցով երեխաները կարտահայտեն իրենց վերաբերմունքն ու պատկերացումները հայրենիքի հանդեպ: Նրանք կկարողանան 3-4 ժամվա ընթացքում վերարտադրել իրենց պատկերացումները, տեսածն ու ընկալածը»,-մասնավորապես ասել է նա:
Մեզ հետ զրույցում Արցախի պետական պատմաերկրագիտական թանգարանի ավագ գիտաշխատող Գոհար Աբրահամյանն էլ ասել է, որ ընդհանուր առմամբ ցուցադրում են Արցախում գործված 15 գորգեր և կարպետներ:
Նրա խոսքով ցուցահանդես-վաճառքի են ներկայացված Արցախի պատմությանը, մշակույթին վերաբերող բազմաթիվ գրքեր և Արցախի տեսարժան վայրերն արտացոլող լուսանկարներ:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -36-:
