Մարտունու շրջանի Նորշենի Լեոնիդ Հուրունցի անվան դպրոցում իրականացվել է հերթական նախագիծը, որի շրջանակում դպրոցը գունավորվել է տարբեր առարկաներին վերաբերող կրթական նկարազարդումներով՝ ֆիննական դպրոցների սկզբունքով:
Նորշենի Լեոնիդ Հուրունցի անվան դպրոցում իրականացվել է հերթական նախագիծը (լուսնկարներ)
ՍՏԵՓԱՆԱԿԵՐՏ, 5 սեպտեմբերի, ԱՐՑԱԽՊՐԵՍ: Այսօր տեղի է ունեցել Նորշենի գունազարդ դպրոցի բացման արարողությունը, որին ներկա էին ԱՀ կրթության, գիտության և սպորտի նախարար Նարինե Աղաբալյանը, փոխնախարար Միքայել Համբարձումյանը, նախագծի ղեկավար, «Դասավանդի՛ր, Հայաստան» հիմնադրամի անդամ Արա Հարությունյանը, ով նախկինում Նորշենի դպրոցում ֆիզիկա էր դասավանդում:
«Արցախպրես»-ի թղթակցի հետ զրույցում Արա Հարությունյանն ասել է, որ նման նախագիծ իրականացնելու մտահղացումն իր մոտ առաջացել է դեռս մեկ տարի առաջ: 
Ըստ Ա. Հարությունյանի՝ ծրագիրն իրականացվել է ամերիկաբնակ Փոլ և Ջանեթ Խալարիանների ընտանիքի ֆինանսավորմամբ: Նախագիծը կյանքի են կոչել Ա. Հարությունյանի ընկերները՝ Անի Խաչատրյանը և Նելլի Սարգսյանը: Վերջիններս մոտ երկու շաբաթ մնացել են Նորշենում և առավոտից երեկո աշխատել դպրոցի աշակերտների հետ, օգնել նրանց գունազարդել ու ծաղկեցնել դպրոցը՝ զարգացնելով երեխաների հմտությունները, ինչպես նաև ստեղծել մնացյալ ուսուցողական դեկորներ ու ատրիբուտներ:
«Այն ստացել է նոր, յուրահատուկ տեսք՝ ձեռք բերելով ավելի մոտիվացնող, ջերմ գույներ: Իր տեսակի մեջ Նորշենի դպրոցն այս պահին միակն է Արցախում: Կարծում եմ, որ այս օրինակը կծառայի նաև Արցախի այլ դպրոցների համար»,-մասնավորապես ասել է Ա. Հարությունյանը:
ԱՀ կրթության, գիտության և սպորտի նախարար Նարինե Աղաբալյանը ողջունել է նման նախագծի իրագործումը:
Նա նշել է, որ գունազարդ դպրոցի առկայությունն ուսանելի է լինելու աշակերտների համար:
Նախարարը վստահություն է հայտնել, որ Նորշենի դպրոցը նոր խթան է հանդիսանալու նաև աշակերտների ստացած գիտելիքների և ուսուցման գործընթացի որակի վրա:
Ն. Աղաբալյանը շնորհակալություն է հայտնել Արա Հարությունյանին՝ նախագծի իրականացման, ինչպես նաև անցած տարիների ընթացքում դպրոցում ունեցած զգալի ավանդի համար: ԱՀ ԿԳՍ նախարարության կողմից դպրոցին է հանձնվել տպիչ սարք:
Դպրոցի աշկերտներ Աննա Ծատրյանը և Մանանա Հակոբյանը մեզ հետ զրույցում ասել են, որ իրենք մասնակցել են հարազատ կրթօջախի գունազարդման աշխատանքներին:
Նրանք համոզված են, որ նոր նախագիծն էլ ավելի կաշխուժացնի իրենց առօրյան:
Միջոցառմանը դպրոցի աշակերտները հանդես են եկել հայրնեասիրական երգերով, ազգագրական պարերով:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -62-:
