Մոսկվան պաշտոնապես հաստատել է ՌԴ նախագահ Վլադիմիր Պուտինի՝ հոկտեմբերի 1-ին Երևան կատարելիք այցը:
Պուտինը հենց այնպես չի այցելում Հայաստան. ռուս փորձագետը նշում է այցի հնարավոր շարժառիթները
ՍՏԵՓԱՆԱԿԵՐՏ, 25 սեպտեմբերի, ԱՐՑԱԽՊՐԵՍ: ՌԴ նախագահը մասնակցելու է Եվրասիական տնտեսական բարձրագույն խորհրդի նիստին: Պլեխանովի անվան Ռուսաստանի տնտեսագիտական համալսարանի դոցենտ Ալեքսանդր Փերենջիևը SHANTNEWS.am-ի փոխանցմամբ Rusarminfo-ի հետ զրույցում նշել է՝ կարծում է, որ ՌԴ նախագահի այս այցը բխում է երկու երկրների դաշնակցային հարաբերություններից:
«Այս այցն ամենից առաջ կապված է այն հանգամանքի հետ, որ նա պետք է լինի ԵԱՏՄ և ՀԱՊԿ շրջանակներում իր դաշնակից երկրում: Այս հանգամանքը շատ կարևոր է: Երկրորդը, ես կարծում եմ, որ ՌԴ նախագահը երբեք հենց այնպես այցեր չի կատարում: Կարծում եմ՝ նախապատրաստված են ինչ-որ փաստաթղթեր, որոնք, հնարավոր է, կստորագրվեն»,- ասել է նա:
Փորձագետը կարծում է, որ ՌԴ նախագահի՝ Հայաստան կատարելիք այցը նաև նպատակ ունի ճշգրտումներ անել երկու երկրների հարաբերությունների ներկա դրության մասին:
Պետք է հասկանալ՝ ի՞նչ է ուզում Հայաստանը, ո՞ր ուղղությամբ է շարժվում. նա կամ ՌԴ դաշնակիցն է, կամ ձգտում է դեպի Արևմուտք: Պետք է հասկանալ խաղի կանոնները: Ռուսաստանը ցանկանում է պարզել՝ ինչպե՞ս կառուցի Հայաստանի հետ հարաբերությունները: Եթե կան կոնֆլիկտային հարցեր, ապա պետք է որոշել խաղի կանոնները: ՌԴ նախագահը կցանկանար հանել սուր պահերը, հասկանալ Հայաստանի դիրքորոշումը սուր հարցերի ուղղությամբ, նաև պարզել՝ որ ուղղությամբ կարող ենք մենք շարժվել»,- նշել է Փերենջիևը:
Նա չի բացառել, որ Պուտինի՝ Հայաստան այցի ժամանակ կարող է քննարկվել ԼՂ խնդրի կարգավորման հարցը, մասնավորապես՝ Մադրիդյան սկզբունքների կյանքի կոչումը, ինչպես նաև կարող է լինել զրույց Ադրբեջանի՝ ՀԱՊԿ անդամ դառնալու վերաբերյալ:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -59-:
