Ստեփանակերտում կայացել է «Պոլ Էլյուարի տուն ֆրանկոֆոնիայի կենտրոն» հիմնադրամի հերթական նիստը, որի ընթացքում ստորագրվել է համաձայնագիր
Այսօր՝ հոկտեմբերի 12-ին, Ստեփանակերտի «Արմենիա» հյուրանոցի կոնֆերանս դահլիճում գումարվել է «Պոլ Էլյուարի տուն ֆրանկոֆոնիայի կենտրոն» հիմնադրամի հոգաբարձուների խորհրդի անդամների ու տնօրինության հերթական նիստը, որի ընթացքում ստորագրվել է համաձայնագիր Արցախի Հանրապետության կառավարության, Ֆրանսիայում համահայկական հիմնադրամի ղեկավարության և Ֆրանսիայում գործող «Ֆրանսախոսությունն Արցախում» կազմակերպության միջև:
Ստեփանակերտում կայացել է «Պոլ Էլյուարի տուն ֆրանկոֆոնիայի կենտրոն» հիմնադրամի հերթական նիստը, որի ընթացքում ստորագրվել է համաձայնագիր
ՍՏԵՓԱՆԱԿԵՐՏ, 12 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Պոլ Էլյուարի տուն ֆրանկոֆոնիայի կենտրոն» հիմնադրամի տնօրեն Նելլի Ավանեսյանն ասել է, որ հանդիպմանը նախատեսվում է հիմնադրամի գործադիր տնօրեն նշանակել Ժիրայր Գերգերյանին, ով ժամանել է Ֆրանսիայից և ղեկավարելու է «Պոլ Էլյուարի տուն» ֆրանսախոսների կենտրոնի կառուցման ամբողջ շինարարական աշխատանքները, որոնց մեկնարկը տրվել է 2015 թվականին ամռանը:
«Հանդիպման ընթացքում կներկայացնեմ 2015 թվականի վերջից մինչև այսօր ծավալած իմ գործունեությունը, որի ընթացքում մենք կարողացել ենք հավաքագրել 12 խումբ՝ ավելի քան 150 ուսանողներով, որոնք տարբեր ոլորտների ներայացուցիչներ են և որոնց թվում եղել են Արցախ-Ֆրանսիա բարեկամության շրջանակի անդամներ, բժիշկներ, արտգործնախարարության աշխատողներ, ուսանողներ և այլք: Առանձնացնելու ենք նաև այն մեծ միջոցառումները, որոնք տեղի են ունեցել Արցախում և որոնց միջոցով արցախահայությունը կարողացել է ծանոթանալ ֆրանսիական մշակույթին: Ցանակացած պատվիրակության այցի ժամանակ նույնպես կազմակերպել ենք միջոցառումներ և նրանց ցույց տվել, որ մենք՝ արցախցիներս, կարողանում ենք յուրացնել ֆրանսերեն լեզուն և ներկայացնել ֆրանսիական մշակույթը, ինչպես նաև միաժամանակ նրանց ծանոթացրել ենք հայկական մշակույթին: Չորս տարիների ընթացքում կազմակերպել ենք մոտ 17 մշակութային միջոցառումներ: «Պոլ Էլյուարի տուն» կենտրոնը զբաղվելու է ֆրանսերեն լեզվի տարածմամբ, ոչ միայն մայրաքաղաքում, այլ նաև շրջաններում և ֆրանսերեն լեզվի տիրապետման շնորհիվ մենք առավել լայն հնարավորություններ կունենանք վերապատրաստումներ կազմակերպելու համար»,-ասել է Ն. Ավանեսյանը:
Մեզ հետ զրույցում Ֆրանսիայի Ազգային ժողովի նախկին պատգամավոր, Ֆրանսիա-Արցախ բարեկամության շրջանակի անդամ Ֆրանսուա Ռոշբլուանն ասել է, որ իրենց գործունեության մեկնարկը տրվել է 4 տարի առաջ և այդ գործում մեծ ներդրում է ունեցել կենտրոնի այսօրվա տնօրենը, ում շնորհիվ ֆրանսերեն լեզուն տարածվել է Արցախում:
«Մենք ցանկանում ենք, որ ծրագիրը շարունակական լինի, որովհետև ֆրանսերեն լեզուն մի միջոց է, որին տիրապետող արցախահայությունը հնարավորություն կունենա մեկնելու Ֆրանսիա և ունենալու վերապատրաստումներ տարբեր բնագավառներում:Արդեն տրված է «Պոլ Էլյուարի տուն» ֆրանսախոսների կենտրոնի շինարարական աշխատանքների մեկնարկը, որի բացումը նախատեսվում է 2020 թվականի սեպտեմբերի 2-ին՝ Արցախի Հանրապետության անկախության օրը»,-մասնավորապես ասել է նա:
Հանդիպմանը բացման խոսքով հանդես է եկել ԱՀ կրթության, գիտության և սպորտի նախարար Նարինե Աղաբալյանը:Ողջունելով ներկաներին՝ նա անդրադարձել է նիստի օրակարգային հարցերին: Ն. Աղաբալյանի խոսքով «Պոլ Էլյուարի տուն ֆրանկոֆոնիայի կենտրոն» հիմնադրամը ստեղծվել է 2015 թվականին ԱՀ կառավարության նախաձեռնությամբ:
«Ստեղծման օրվանից գործում էր հոգաբարձուների մեկ այլ խորհուրդ: Ընդառաջելով ֆրանսիական խորհրդի ցանկությանը մենք որոշ փոփոխություններ ենք արել հոգաբարձուների խորհրդի կազմում՝ նպատակ ունենալով ավելի մեծ թափ հաղորդել կենտրոնի շինարարության և հետագա գործունեության աշխատանքներին:2019 թվականի հուլիսի 31-ի ԱՀ կառավաության որոշմամբ կազմում կատարվել է փոփոխություն: Հիմնադրամի հոգաբարձուների խորհուրդը գլխավորում է խորհրդի նախագահը, ով ի պաշտոնե ԱՀ կրթության, գիտության և սպորտի նախարարն է:Խորհրդի անդամներ են հանդիսանում ԱՀ արտաքին գործերի նախարարը, ի պաշտոնե Ստեփանակերտ քաղաքի քաղաքապետը, Շուշիի քաղաքապետը, ի պաշտոնե Ֆրանսիայում ԱՀ ներկայացուցիչը, Հայաստան համահայկական հիմնադրամի Ֆրանսիայի տեղական մարմնի ներկայացուցիչը, ֆրանսիական բարեկամ քաղաքների քաղաքապետերին միավորող միության նախագահը, ի պաշտոնե Ֆրանսիայի Վալանս քաղաքի քաղաքապետը և Ալֆորվիլի քաղաքապետը:Ես շնորհավորում եմ հոգաբարձուների խորհրդի նոր անդամներին և մաղթում բոլորիս արդյունավետ համագործակցություն»,-մասնավորապես ասել է նա:
ԱՀ արտաքին գործերի նախարար Մասիս Մաիլյանն իր ելույթում մասնավորապես ասել է, որ ծրագիրը պետք է համախմբի և համակարգի Ֆրանսիայի քաղաքների հետ Արցախի համագործակցությունը:Նրա խոսքով կրթական ոլորտում Նելլի Ավանեսյանի կատարած աշխատանքն արժանի է գնահատանքի և խրախուսանքի:
ԱՀ պետնախարար Գրիգորի Մարտիրոսյանն էլ ողջունել է կենտրոնի նոր շենքի կառուցման ծրագիրը:
«Համոզված եմ, որ կենտրոնը մեծ դերակատարություն կունենա Արցախի կրթական և մշակութային կյանքում, ինչպես նաև գեղեցիկ ճարտարապետական տեսքով անկասկած իր արժանի տեղը կգրավի մայրաքաղաքում:Ուրախությամբ ցանկանում եմ նշել նաև, որ ծրագրի ֆինանսավորման հետ կապված որոշակի թյուրըմբռնման հարցերը կարգավորվել են կառավարության կողմից:Հաջողություն եմ մաղթում այս գործընթացին և վստահ եմ, որ կարճ ժամանակահատվածում կունենանք նոր թափ ու վերելք»,-մասնավորապես ասել է Գ. Մարտիրոսյանը:
«Պոլ Էլյուարի տուն» ֆրանսախոսների կենտրոնի ստեղծման մասին համաձայնագիրը ստորագրվել է Գրիգորի Մարտիրոսյանի և Ֆրանսուա Ռոշբլուանի կողմից: