ՍՏԵՓԱՆԱԿԵՐՏ, 4 նոյեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ գիտաժողովին բացման խոսքով հանդես է եկել ԱրՊՀ ռեկտոր Արմեն Սարգսյանը: Նա նշել է, որ մայր բուհի 50-ամյակը, կարծես թե, շուրջ կեսդարյա մաքառումների ճանապարհ է՝ իր դժվարություններով, խոչընդոտներով, հաջողություններով և թերացումներով, սակայն ամբողջ այդ ճանապարհն ԱրՊՀ-ն անցել է փառապանծ ուղիով:

«ԱրՊՀ-ի գլխավոր մասնաշենքը գտնվում է հիմնանորոգման մեջ, և թերևս դա է պատճառը, որ մենք հնարավորություն չունեցանք այս տարի նշելու բուհի 50-ամյակը բոլոր ուղղություններով, սակայն դա չի խանգարել, որպեսզի ԱրՊՀ գիտական խորհուրդը 2019-2020 ուսումնական տարին հռչակի որպես մայր բուհի 50-ամյակին նվիրված միջոցառումների տարի: Միջազգային գիտաժողովին մասնակցում են շուրջ 150 ուսանողներ Երևանի պետական, Հայաստանի պետական տնտեսագիտական, Հայ-ռուսական (Սլավոնական), Գորիսի պետական, Վանաձորի պետական, Հայաստանի պետական մանկավարժական, Գավառի պետական, Մերձդնեստրի Շեվչենկոյի անվան պետական, հեռակա կարգով նաև Ռուսաստանի, Հարավային Օսիայի, Աբխազիայի տարբեր համալսարաններից»,- ասել է Ա. Սարգսյանը:

Գիտաժողովի մասնակիցներին ողջունել է ԱՀ Ազգային ժողովի նախագահ Աշոտ Ղուլյանը, ով իր խոսքում նշել է, որ 50-ամյակը ոչ միայն պատկառելի և գեղեցիկ հոբելյան է, այլև անցած ճանապարհը վերարժևորելու և ապագայի տեսլականն ուրվագծելու իսկական ժամանակ:

«Կեսդարյա իր պատմության ընթացքում համալսարանն առերեսվել է բազմաթիվ մարտահրավերների: Իր գոյության յուրաքանչյուր տասնամյակում համալսարանի առջև ծառացած խնդիրները տարբեր էին, և տարբեր էին նաև այդ խնդիրները հաղթահարելու հնարավորություններն ու կարողությունները: Սակայն նույնն էր նպատակը՝ լինել Արցախում գիտակրթական կենտրոն և հայապահպանության օջախ»,- ավելացրել է Ա. Ղուլյանը:

Համալսարանի խորհրդանշական կեսդարյա կերտված կուռ պատմության առթիվ շնորհավորել և ուսանողական միջազգային գիտաժողովի աշխատանքներին հաջողություն է մաղթել ԱՀ պետական նախարար, ԱրՊՀ խորհրդի նախագահ Գրիգորի Մարտիրոսյանը:

Իր խոսքում Գրիգորի Մարտիրոսյանը նշել է, որ ավելի քան կես դար Արցախի պետական համալսարանը ԼՂՀ Ինքնավար մարզի, ապա նորանկախ Արցախի բարձրագույն կրթության և գիտության հասարակական, տնտեսական ու քաղաքական բնագավառներում իր առանձնահատուկ տեղն ու դերն ունի:

«Խորհրդային տարիներին բավականին բարդ ժամանակահատվածում ուսանողական հասարակությունը եղել է ազգային արժեքների պահպանման կարևորագույն կենտրոնը: Այնտեղ միաբանված հայ մտավորականությունը և ուսանողությունը պատվով են դիմակայել Բաքվի իշխանությունների գիտակրթական դավադիր քաղաքականությանը: Իսկ Արցախյան շարժման տարիներին բարձրագույն հաստատությունը գաղափարական կենտրոններից էր, որտեղ կենտրոնացված էր երիտասարդության շարժիչ ուժը: Հարգանքով ու խոնարհումով ենք հիշում բոլոր այն ուսանողներին, ովքեր գրիչը փոխարինել են զենքով և արել անհնարինը՝ պաշտպանելով հայրենիքը, հերոսանալով ու ապրեցնելով ազատության գաղափարը»,- մասնավորապես ասել է ԱրՊՀ խորհրդի նախագահը:

ԵՊՀ իրավաբանական ֆակուլտետի դեկան, իրավաբանական գիտությունների դոկտոր, պրոֆեսոր, ՀՀ Գիտությունների ազգային ակադեմիայի ակադեմիկոս Գագիկ Ղազինյանն էլ կարևորել է միջազգային գիտաժողովի անցկացումը և նշել, որ իրենց ֆակուլտետն իր հնարավորությունները փորձում է օգտագործել՝ Արցախի պետական համալսարանին բովանդակային աջակցություն ցուցաբերելու համար:

Գիտաժողովի մասնակիցներին ուղերձ է հղել Նորանկախ հանրապետությունների համալսարանների ասոցիացիայի ղեկավար, Մերձդնեստրի պետական համալսարանի ռեկտոր, պրոֆեսոր Ստեփան Բերիլը:

Միջազգային գիտաժողովի բացմանը ներկայացվել է նաև համալսարանի 50-ամյա գործունեության մասին պատմող ֆիլմ: Այնուհետև տեղի է ունեցել  լիագումար նիստը, որին զեկուցումներով հանդես են եկել ԱրՊՀ ՈՒՇՀՀՏԱ գծով պրոռեկտոր Վիտյա Յարամիշյանը (Արցախի մայր բուհի 50-ամյա գործունեությունը), Վանաձորի պետական համալսարանի ուսանողուհի Շուշան Ներսիսյանը («Հայր» հասկացույթի իմաստային ընկալումները), Հայ-ռուսական համալսարանի ուսանողուհի Անժելիկա Առուշանյանը(Միջազգային դատարանների դերը միջազգային վեճերի խաղաղ կարգավորման գործում), ԱրՊՀ ուսանողուհի Թամար Գրիգորյանը (Ժամանակակից բանկային համակարգ և կրիպտոարժեքներ):

Հաջորդիվ գիտաժողովի աշխատանքները շարունակվել են առանձնին մասնախմբերում: Գիտաժողովը կշարունակվի նաև վաղը, և «Մատենադարան-Գանձասար» գիտամշակութային կենտրոնում տեղի կունենա մասնակիցների հավաստագրերի հանձնման ու գիտաժողովի փակման հանդիսավոր արարողությունը:

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -37-: