Աշխարհի 100 խոշոր պաշտպանական ընկերությունների զենքի վաճառքի եւ ռազմական ծառայությունների ծավալը 2018-ին ավելացել է 4,6 տոկոսով եւ կազմել 420 մլրդ դոլար, ասվում է Ստոկհոլմի հետազոտությունների միջազգային ինստիտուտի (SIPRI) ամենամյա զեկույցում:
Աշխարհում զենքի վաճառքը 2018 թվականին ավելացել է 4,6 տոկոսով. SIPRI
ՍՏԵՓԱՆԱԿԵՐՏ, 9 դեկտեմբերի, ԱՐՑԱԽՊՐԵՍ։ Զեկույցի համաձայն՝ 2002-ի համեմատ վաճառքի ծավալը 2018-ին ավելացել է 47 տոկոսով։ Վարկանիշի առաջին հինգ տեղերում ամերիկյան ընկերություններն են, առաջինը Lockheed Martin-ն է։ Ամերիկյան հինգ ընկերությունների վաճառքի ընդհանուր ծավալը կազմել է 148 մլրդ դոլար (վաճառքի ընդհանուր ծավալի 35 տոկոսը), փոխանցում է news.am-ը:
Տասը ռուսական ընկերություններին բաժին է ընկնում վաճառքի ընդհանուր ծավալի 8,6 տոկոսը (36,2 մլրդ դոլար)։ Այս ցուցանիշը նվազել է 2017-ի համեմատ, երբ այն կազմում էր 9,7 տոկոս։ Ինչպես նշվում է զեկույցում, ռուսական ընկերությունների վաճառքի ծավալը մնում է կայուն մակարդակի, նվազումը կապված է ամերիկյան եւ եվրոպական ընկերությունների վաճառքի ավելացման հետ։
«2018-ին «Ալմազ-Անթեյ» կոնցեռնի (Ռուսաստանում սպառազինությունների ամենամեծ արտադրողը) վաճառքը շարունակել է աճել։ Վաճառքի ծավալի ավելացումը պայմանավորված էր ոչ միայն բարձր ներքին պահանջարկով, այլեւ այլ երկրներ սպառազինությունների (մասնավորապես Ս-400 ԶՀՀ-ներ) վաճառքի աճով»,- զեկույցում մեջբերվում են հետազոտության հեղինակներից մեկի՝ SIPRI-ի Սպառազինությունների եւ ռազմական ծախսերի գիաշխատող Ալեքսանդրա Կուիմովայի խոսքերը։
2018-ին նկատվել է թուրքական ընկերությունների վաճառքի զգալի ավելացում՝ 22 տոկոս (2,8 մլրդ դոլար)։ Փորձագետները դա կապում են Թուրքիայի՝ իր պաշտպանական արդյունաբերությունն արդիականացնելու ձգտման հետ։ Զեկույցում չեն ներկայացվել տվյալներ չինական ընկերությունների վաճառքի մասին։
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -46-:
