Անցած տարում պետական-իրավական փորձաքննության են ենթարկվել շուրջ 852 նորմատիվ իրավական ակտերի նախագծեր, որոնցից 77-ը` օրենքի և 775-ը` ենթաօրենսդրական նորմատիվ իրավական ակտերի:
Անցած տարում պետա-իրավական փորձաքննության են ենթարկվել շուրջ 852 նորմատիվ իրավական ակտերի նախագծեր
ՍՏԵՓԱՆԱԿԵՐՏ, 23 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած ամփոփիչ մամուլի ասուլիսի ժամանակ ասել է ԱՀ արդարադատության նախարար Արարատ Դանիելյանը և ավելացրել, որ դրանց վերաբերյալ տրվել են գործող օրենսդրության պահանջներից բխող մի շարք առաջարկություններ, որոնք հիմնականում ընդունվել են:
Նախարարը նշել է, որ նախագահին առընթեր սահմանադրական բարեփոխումների համակարգման խորհրդին է ներկայացվել «ԱՀ վարչական իրավախախտումների վերաբերյալ» ԱՀ օրենսգրքի նախագիծը, «Հասարակական կազմակերպությունների մասին», ««Ապրանքային և սպասարկման նշանների, ապրանքների ծագման տեղանունների մասին» ԼՂՀ օրենքում փոփոխություն կատարելու մասին», ««Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասին» ԼՂՀ օրենքում փոփոխություններ և լրացումներ կատարելու մասին», ««Պետական տուրքի մասին» ԼՂՀ օրենքում լրացում կատարելու մասին», «ԼՂՀ քաղաքացիական օրենսգրքում փոփոխություններ և լրացումներ կատարելու մասին» օրենքների նախագծերի փաթեթը և ««Տեղական հանրաքվեի մասին», «Ընտրական օրենսգրքում փոփոխություն և լրացումներ կատարելու մասին», ««Տեղական ինքնակառավարման մասին» օրենքում փոփոխություններ և լրացումներ կատարելու մասին» օրենքների նախագծերի փաթեթը:
Ուսումնասիրվել են ԱՀ ԱԺ պատգամավոր Լյուդմիլա Բարսեղյանի կողմից օրենսդրական նախաձեռնության կարգով ներկայացված` ««ԼՂՀ պատվավոր կոչումների մասին» ԼՂՀ օրենքում փոփոխություն կատարելու մասին», Էդուարդ Աղաբեկյանի կողմից օրենսդրական նախաձեռնության կարգով ներկայացված` «ԼՂՀ ընտրական օրենսգրքում լրացում կատարելու մասին», Վարդգես Ուլուբաբյանի և Սերգեյ Հարությունյանի կողմից օրենսդրական նախաձեռնության կարգով ներկայացված` ««Ավելացված արժեքի հարկի մասին» ԼՂՀ օրենքում փոփոխություն և լրացում կատարելու մասին» օրենքների նախագծերը, որոնց արդյունքում ներկայացվել են համապատասխան առաջարկություններ:
Կազմակերպվել և իրականացվել են «ԱՀ վարչական իրավախախտումների վերաբերյալ» ԱՀ օրենսգրքի նախագծի, «Հասարակական կազմակերպությունների մասին» ու իր հարակից օրենքների նախագծերի փաթեթի և «Հանրագրերի մասին» ու հարակից օրենքների նախագծերի փաթեթի շուրջ հանրային քննարկումներ, որին մասնակցել են շահագրգիռ պետական և տեղական ինքնակառավարման մարմինների ներկայացուցիչներ: Օրենքով սահմանված կարգով հաշվառվել, համակարգվել և պահպանվել են 2019 թ.-ին ստացված ԱՀ իրավական ակտերի պաշտոնական օրինակները:
Մամուլի ասուլիսին Ա. Դանիելյանը ներկայացրել է նաև օրենքների այն նախագծերը, որոնք մշակվել և սահմանված կարգով ընթացքավորվել են:
