««Որոշում» քաղաքացիական նախաձեռնություն» հասարակական կազմակերպությունը կյանքի է կոչում «Առողջ Արցախ» խորագրով ծրագիրը, որի շրջանակներում կառույցը՝ անդամների և համակիրների հետ, լծվել է իրենց կողմից պատրաստված պաշտպանիչ դիմակները բնակչությանը տրամադրելու գործընթացին։
««Որոշում» քաղաքացիական նախաձեռնություն»-ը «Առողջ Արցախ» խորագրով ծրագիր է սկսել
ՍՏԵՓԱՆԱԿԵՐՏ, 16 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է կազմակերպության համահիմնդիր Սևակ Հակոբյանը:
Նրա խոսքով՝ ժողովրդի համար գերկարևոր այս պահին բոլորը պետք է մի կողմ թողնեն իրենց կուսակցական կամ քաղաքական նախապատվությունները և համախմբված, համատեղ ուժերով, լծվեն աշխարհը կեղեքող վարակից պաշտպանվելու օպերատիվ միջոցառումների պրոցեսին։ Առողջ Արցախ ունենալու համար անհրաժեշտ է արտակարգ ռեժիմով և կոնսոլիդացված պայքար։
«Հանուն «Առողջ Արցախ» ունենալու գաղափարի իրագործման՝ կազմակերպությունը նպատակ է ունեցել ներգրավել հնարավորինս լայն հասարակական հատված: Ուրախ ենք հայտնելու, որ նախաձեռնությանն արդեն միացել է Արցախի Հանրապետության անվտանգության խորհրդի քարտուղար, Արցախի հերոս, գեներալ-լեյտենանտ Արշավիր Ղարամյանը, ով պատրաստակամություն է հայտնել իր և իր ընտանիքի կողմից նյութական աջակցություն ցուցաբերելու։ Նկատի ունենալով այդ հանգամանքը, ինչպես նաև այն, որ համաճարակի դեմ պայքարում անհրաժեշտ են միջոցառումներ, որոնք պահանջում են լուրջ ֆինանսական ներդրումներ, կազմակերպությունն այս ծրագրին աջակցություն ցուցաբերել ցանկացողներին առաջարկում է գործող բանկային հաշվեհամարը։ Կազմակերպության անվամբ «Արցախբանկ»-ում գործող AMD-22300043944600, USD- 22300043944601 հաշվեհամարներում սկզբնական փուլում կկուտակվեն նախաձեռնությանը միացողների կողմից նվիրաբերված գումարները՝ «Առողջ Արցախ» ծրագրի լիարժեք իրականացման համար ծախսելու նպատակով, իսկ առաջիկայում Կազմակերպությունը կիրականացնի քայլեր՝ ստեղծելու հիմնադրամ, որի գործունեության նպատակն է լինելու մեր համաքաղաքացիների առողջության պահպանմանն ուղղված համալիր ծրագրերի իրականացումը»,-մասնավորապես ասել է Ս. Հակոբյանը։
Մեր զրուցակցի խոսքով՝ կազմակերպությունը պատրաստակամ է «Առողջ Արցախ» ծրագրի ամբողջական իրականացման նատակով համագործակցելու ինչպես առողջապահության և արտակարգ իրավիճակների ոլորտներում պետական լիազոր մարմինների, այնպես էլ տվյալ բնագավառներում մասնագիտական փորձ ունեցող մասնավոր և հանրային կառույցների հետ։
«Առաջիկա օրերին Կազմակերպության Խորհրդում հրավիրվելու է համապատասխան քննարկում՝ անելիքները հստակեցնելու նպատակով, այնուհետև իրականացվելու են Հիմնադրամի ստեղծման համար անհրաժեշտ գործողությունները։ Միաժամանակ, Կազմակերպությունը հանդես է գալու շահագրգիռ կառույցներին և անհատներին ուղղված հրավերով՝ սույն նախաձեռնությանը ներգրավվելու նպատակով»,- նշել է Ս. Հակոբյանը։