Կազմակերպվել է «Կորոնավիրուսի ազդեցությունը կրթության իրավունքի իրացման վրա. հիմնախնդիրներ և լուծումներ» թեմայով քննարկում
ԱՀ մարդու իրավունքների պաշտպանի և ԱՀ Ազգային ժողովի համատեղ նախաձեռնությամբ այսօր՝ օգոստոսի 27-ին, ԱՀ Ազգային ժողովի նիստերի դահլիճում կազմակերպվել է «Կորոնավիրուսի ազդեցությունը կրթության իրավունքի իրացման վրա. հիմնախնդիրներ և լուծումներ» թեմայով քննարկում:
Կազմակերպվել է «Կորոնավիրուսի ազդեցությունը կրթության իրավունքի իրացման վրա. հիմնախնդիրներ և լուծումներ» թեմայով քննարկում
ՍՏԵՓԱՆԱԿԵՐՏ, 27 օգոստոսի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ քննարկմանը բացման խոսքով հանդես է եկել ԱՀ Ազգային ժողովի նախագահ Արթուր Թովմասյանը:
Նրա խոսքով՝ Նոր կորոնավիրուսի համավարակի պայմաններում ստեղծված իրադրությունը մեծ մարտահրավեր է ոչ միայն պետական կառավարման, այլ նաև կրթական համակարգի համար՝ ուղիղ և բացասական կերպով ազդելով մարդկանց բազմաթիվ իրավունքների վրա:
«Այն, որ կրթության որակի ապահովումն առօրյայում ինքնին աշխատատար և միասնական ջանքեր պահանջող գործընթաց է, հստակ է, իսկ առցանց ուսուցման պարագայում՝ այն առավել մեծ ջանքեր ու նորարարական մոտեցումներ է պահանջում: Դպրոցի տևական փակվելը կարող է հանգեցնել աշակերտների մոտ ուսումնական առաջադիմության անկման: Մանկապարտեզների և նախակրթարանների փակումը որոշակիորեն ազդել են ընտանիքների վրա՝ շատ ծնողներ կանգնել են երեխաների խնամքն ու աշխատանքը համատեղելու խնդրի առջև»,- մասնավորապես ասել է Խորհրդարանի նախագահը:
ԱՀ մարդու իրավունքների պաշտպան Արտակ Բեգլարյանը, իր հերթին ողջունելով քննարկման մասնակիցներին, նշել է, որ նման ձևաչափով հանդիպումների կազմակերպումը պարբերկան բնույթ է կրելու՝ հանրությանը հետաքրքրող տարբեր թեմաների շուրջ:
«Պետք է առաջնորդվել Սահմանադրության 37 և 38 –րդ հոդվածներով, որոնք այսօրվա քննարկվող թեմայի համար առանցքային նշանակություն ունեն և պետք է հասկանալ, թե որտեղ է հավասարակշռությունը՝ կրթության իրավունքի և երեխայի լավագույն շահերի: Այստեղ պետք է երկու հիմնական խնդիր դիտարկել. առաջինը կրթության իրավունքի հետ ուղիղ կերպով առնչող այլ իրավունքներն են և դրանցով պայմանավորված վտանգներն ու հետևանքները սովորողների իրավունքների վրա: Երկրորդը առողջապահական ռիսկերն են, և դրանք ցավոք սրտի, անորոշություններով են պայմանավորված լինում համավարակի պայմաններում: Մենք՝ որպես հասարակության ակտիվ անդամներ, պետք է փորձենք գտնել ճիշտ լուծումներ»,- մասնավորապես ասել է Ա. Բեգլարյանը:
Այնուհետև նա ներկայացրել է համավարակի շրջանում կրթության ոլորտում իրականացված և իրականացվող աշխատանքները, ինչպես նաև գրանցված դեպքերը:
Խոսելով կենդանի և առցնանց ուսուցման մասին՝ Ա. Բեգլարյանը նշել է, որ բոլոր մասնագետները պնդում են, որ կենդանի կրթությունը շատ ավելի արդյունավետ է, քան՝ առցանցը: Այս ուղղությամբ լուրջ հետազոտություններ առյժմ Արցախում չկան:
Ըստ ՄԻՊ-ի՝ պետք է մոդել մշակել, որպեսզի բուհերում դասախոսություններն առցանց եղանակով հասանելի լինեն ուսանողներին, որը կիրառելի է շատ զարգացած համալսարանում:
ԱՀ կրթության, գիտության և մշակույթի նախարար Լուսինե Ղարախանյանի խոսքով՝ համավարակի շրջանում փոխվել է կրթության համակարգի պատկերը:
«Մեր նախարարությունն իրականացրել է վերլուծություն՝ մարտի 13-ից մինչև մայիսի վերջն ընկած ժամանակահատվածը ներառելով՝ պարզելով առցանց ուսուցման արդյունքները: Այդ վերլուծության հիման վրա հստակեցրել ենք, թե քանի աշակերտ և ուսուցիչ չունեն տեխնիկական գործիք, և քանի դպրոց է, որ չունի համացանց: Այս ընթացքում մենք մշակել ենք նախադպրոցական հասատատություններում գործունեություն սկսելու սկզբունքները, որն արդեն Պարետի որոշմամբ հաստատված է»,- ավելացրել է նախարարը:
Նա տեղեկացրել է, որ սկսված են օգոստոսյան խորհրդակցությունները, և ԱՀ ԿԳՄ նախարարությունը այս շրջանում դպրոցներին տրամադրում է դիմակներ, ախտահանիչ միջոցներ և ջերմաչափող սարքեր:
«Նախարարությունը հովանավորչական միջոցներով ձեռք է բերել ավելի քան 1000 սմարթֆոններ և դյուրակիր համակարգիչներ: Մինչև սեպտեմբերի 14-ն դրանք կբաժանվեն այն աշակերտներին և ուսուցիչներին, ովքեր դրա կարիքն ունեն: Համաճարակային իրավիճակից ելնելով՝ ներկա փուլում հանրակրթական, նախնական մասնագիտական (արհեստագործական), միջին մասնագիտական ուսումնական հաստատություններում ուսումնական պարապմունքները մեկնարկելու են 2020 թվականի սեպտեմբերի 14-ից առկա ուսուցմամբ: Յուրաքանչյուր ուսումնական հաստատությունում սահմանվելու է կորոնավիրուսային հիվանդության վարակի հսկողության պատասխանատու, ով ի պաշտոնե ուսումնական հաստատության տնօրենն է լինելու: Պատասխանատվություն են կրելու նաև ուսումնական հաստատությունների բոլոր աշխատակիցները: Պատասխանատուի կողմից օգոստոսի 28-ից սեպտեմբերի 12-ն ընկած ժամանակահատվածում դպրոցի բուժքրոջ ներգրավմամբ կրթօջախի աշխատակիցների համար կազմակերպվելու և իրականացվելու են դասընթացներ, որոնք ներառելու են մոտավոր հետևյալը՝ կորոնավիրուսային հիվանդության առանձնահատկությունների, փոխանցման հնարավոր ուղիների, կանխարգելիչ միջոցառումների վերաբերյալ տեղեկություններ: Աշխատակիցները հրահանգավորվելու են կորոնավիրուսի ախտանշանների առկայության դեպքում աշխատանքի չհաճախելու և բուժօգնության դիմելու մասին: Այս սկզբունքները մշակվել են առողջապահության նախարարի և Պարետի հետ»,- մանրամասնել է Լ. Ղարախանյանը:
Միջոցառմանը, որին մասնակցում էին ԱՀ ԱԺ պատգամավորներ, կրթության ոլորտի ներկայացուցիչներ, հանդես են եկել հարցադրումներով, առաջարկներով և ելույթներով: