«Արարիչ» հիմնադրամը հերթական բարեգործական նախաձեռնությամբ հանդես է եկել Մարտակերտի շրջանի Գետավան համայնքում:
Գետավանցի 77 աշակերտներ ստացել են դպրոցական իրեր
ՍՏԵՓԱՆԱԿԵՐՏ, 14 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում «Արարիչ» բարեգործական հիմնադրամի հոգաբարձուների խորհրդի նախագահ Կարեն Սարգսյանն ասել է, որ արդեն երկրորդ տարին է, ինչ իր մտահղացմամբ հանրպետւթյան տարբեր համայնքների դպրոցականների տրամադրվում են դպրոցական պայուսակներ և գրենական պիտույքներ:
Ըստ Կ. Սարգսյանի՝ Գետավանի 77 դպրոցականներն այս տարի ևս օգտվեցին բարեգործական ծրագրից:«Հիմնադրամն իրականացնում է բարեգործական տարբեր ծրագրեր՝ ձեռք մեկնելով բոլոր այն կարիքավոր քաղաքացիներին, ովքեր իսկապես արժանի են աջակցության: Հիմնադրամն այսուհետ ևս կիրականացնի նմանատիպ ծրագրեր՝ փորձելով ներառել նաև այլ համայնքների դպրոցականների»,- ավելացրել է Կ. Սարգսյանը:
Գետավանի համայնքի ղեկավար Արարատ Զաքարյանը մեզ հետ զրույցում համայնքի բնակիչների, ինչպես նաև դպրոցականների անունից շնորհակալություն է հայտնել «Արարիչ» բարեգործական հիմնադրամի հոգաբարձուների խորհրդի նախագահ Կարեն Սարգսյանին՝ գյուղացիներին աջակցելու համար: 
Ա. Զաքարյանի խոսքով՝ նման ծրագրերի իրականացումը համայնքներում աշխուժացնում է բնականոն կյանքը, մեծ մասամբ թեթևացնում է բնակիչների հոգսերը:
