Շահումյանի շրջանի Զուար համայնքի վարչական տարածքում գտնվող «Ներքին Ջերմաջուր» բնական հուշարձանի մասին սոցցանցերում բարձրացված աղմուկը չափազանցված է:
«Ներքին Ջերմաջուր» բնական հուշարձանի մասին սոցցանցերում բարձրացված աղմուկը չափազանցված է. պատասխանատու
ՍՏԵՓԱՆԱԿԵՐՏ, 16 սեպտեմբերի, ԱՐՑԱԽՊՐԵՍ։ Այս մասին «Արցախպրես»-ի հետ զրույցում ասաց ԱՀ բնապահպանության կոմիտեի նախագահի տեղակալ Արթուր Գաբրիելյանը:
«Իրականում այն ավելի շատ ահազանգ էր, քանի որ բնական հուշարձանի մոտ մարդիկ արհեստական ջրավազան էին սարքել, և սոցցանցերում տարածված նկարը հենց այդ ջրավազանին է վերաբերում: Այսինքն ոչ ոք բնական հուշարձանը չի վնասել, բայց դա չի նշանակում, որ արվածը թույլատրելի աշխատանք էր: Բնական հուշարձանների մոտ ցանկացած շինարարական միջամտություն պետք է ստանար պետական համապատասխան գերատեսչության, տվյալ դեպքում՝ ԱՀ բնապահպանության կոմիտեի գրավոր թույլտվությունը, որը չի եղել: Այժմ քննություն է սկսված, և մեղավորներն անպայման օրենքով նախատեսված կարգով պատասխանատվություն են կրելու», նշել է Ա. Գաբրիելյանը:
Հիշեցնենք, որ սոցցանցերում տեղեկություն էր տարածված, որ անհայտ անձինք էքսկավատորով «Ներքին Ջերմաջուր» բնական հուշարձանի արտաքին տեսքը խաթարել են, ինչն օգտատերերի կողմից մեծ դժգոհություն է առաջացրել:
Լուսանկարները կատարվել են այսօր՝ սեպտեմբերի 16-ին:
