ՍՏԵՓԱՆԱԿԵՐՏ, 25 սեպտեմբերի, ԱՐՑԱԽՊՐԵՍ: Սա հունիսի 28-ից ի վեր առավելագույն օրական աճն է, երբ Ռուսաստանում կորոնավիրուս էր հայտնաբերվել 7658 մարդու մոտ, փոխանցում է news.am-ը:

Անցած օրվա ընթացքում ամենաշատ նոր դեպքեր հայտնաբերել են Մոսկվայում՝ 1560 մարդ, ինչը 510  մարդով ավելի է, քան մեկ օր առաջ։ Կորոնավիրուսային ինֆեկցիայի տարածման առաջատարներ են դարձել նաեւ Պետերբուրգը (+224 մարդ), Մոսկվայի (+208), Ռոստովի (+187) եւ Նիժգորոդի (+168) մարզերը։

Ռուսաստանում անցած մեկ օրում կորոնավիրուսի հետեւանքով մահացել է 108 մարդ, ապաքինվել է 4317-ը։

Ռուսաստանում հայտնաբերված դեպքերի ընդհանուր թիվը հասել է 1 136 048-ի։ Համավարակի ամբողջ ժամանակահատվածում մահացել է 20 056 մարդ, ապաքինվել է 934 146 մարդ։ Ակտիվ դեպքերի թիվը կազմել է 181 846։

Մոսկվայի իշխանությունները 65-ն անց եւ քրոնիկական հիվանդություններով մարդկանց կոչ են արել սեպտեմբերի 28-ից մնալ տանը։ Դրանից բացի, գործատուներին խնդրել են որքան հնարավոր է շատ աշխատակիցների փոխանցել հեռավար աշխատանքի։ Մոսկվայի քաղաքապետ Սերգեյ Սոբյանինը խնդրել է խստորեն հետեւել տրանսպորտում, խանութներում եւ այլ հանրային վայրերում դիմակային եւ ձեռնոցային ռեժիմին։