ՍՏԵՓԱՆԱԿԵՐՏ, 28 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին քիչ առաջ «Արցախ/Տեղեկատվական շտաբ»-ում կայացած բրիֆինգի ժամանակ ասել է ԱՀ արտաքին գործերի նախարար Մասիս Մայիլյանը և ավելացրել, որ այս և երեկ ընդունված հայտարարությունը, որպես պաշտոնական փաստաթուղթ, տարածվել է ԵԱՀԿ-ում: Աշխատանքներ են տարվում նաև ՄԱԿ-ում և այլ միջազգային կառույցներում տարածելու համար:

Նախարարի խոսքով՝ փաստաթղթի մեջ, մասնավորապես, նշվում է, որ այս ընթացքում Ադրբեջանի կողմից տեղի են ունեցել կոպիտ խախտումներ:

«Ադրբեջանը խախտել է իր իսկ կողմից ընդունած Ժնևի կոնվենցիաները: Արցախը, որը ևս միացել է այդ կոնվենցիային, կատարում է իր պարտավորությունները, սակայն Ադրբեջանը խախտում է՝ չնայած նրան, որ ՄԱԿ-ի անդամ է և ճանաչված պետություն»,- ընդգծել է Մ. Մայիլյանը:

ԱԳ նախարարը տեղեկացրել է, որ Արցախի մշտական ներկայացուցչություններն աշխատում են արտակարգ ռեժիմով: Տարվող աշխատանքների շրջանակներում հիմնական ուղղություններից մեկը քաղաքական է: Տարբեր կազմակերպությունների հետ աշխատանքի արդյունքում, ի պաշտպանություն Արցախի, հրապարակվում են մի շարք հայտարարություններ: Մեկ այլ ուղղությամբ՝ ներկայացուցչությունները Սփյուռքի կառույցների հետ համակարգում են Արցախին աջակցելու աշխատանքները:

Մ. Մայիլյանը նշել է, որ վերջին 24 ժամվա ընթացքում ամենակարևոր հայտարարությունն արվել է ԱՄՆ պետդեպարտամենտի կողմից, որտեղ նշվել է, որ երրորդ երկրների ներգրավվածությունը հակամարտության կարգավորման գործընթացում անթույլատրելի է: ԱԳ նախարարի խոսքով՝ այդ կոչն ուղղված է Թուրքիային:

Մ. Մայիլյանը խոսել է նաև հայկական երկու հանրապետությունների արտաքին գերատեսչական ոլորտների համատեղ քայլերի մասին՝ նշելով, որ համակարգված աշխատանքներ են իրականացվում՝ պաշտպանելու հայկական շահերը և հասնելու համազգային նպատակներին: