Որպես չեզոք միջնորդ՝ Լեռնային Ղարաբաղում Կարմիր Խաչի միջազգային կոմիտեի առաքելության աշխատակիցները մասնակցում են դիակների որոնման, տարհանման և կողմերին փոխանցման գործընթացներին:
ԿԽՄԿ-ն պատրաստ է կազմակերպել գերեվարվածների և ներկալվածների վերադարձի գործընթացը՝ կողմերի համապատասխան որոշման դեպքում. Էտերի Մուսայելյան
Այս մասին ‹‹Արցախպրես››-ի թղթակցի հետ զրույցում ասել է Լեռնային Ղարաբաղում ԿԽՄԿ առաքելության խոսնակ Էտերի Մուսայելյանը:
Նա նշել է, որ ԿԽՄԿ-ն անմիջական մասնակցություն չունի որոնման աշխատանքներին, բայց իրենք օգնում են կողմերին կազմակերպել այդ գործընթացը, տրամադրում նյութատեխնիկական աջակցություն և խորհրդատվություն։
Է. Մուսայելյանի խոսքով՝ ԿԽՄԿ-ն ընդունում է հայտեր, գրանցում քաղաքացիական այն անձանց, ովքեր համարվում են անհայտ կորած, ինչպես նաև զինվորական և քաղաքացիական անձանց, որոնք, ենթադրաբար, գտնվում են ազատազրկման մեջ։ ԿԽՄԿ-ն կապի մեջ է նրանց ընտանիքների և կողմերի հետ: Հոկտեմբեր և նոյեմբեր ամիսներին ԿԽՄԿ աշխատակիցները այցելել են այն ռազմագերիներին և ներկալված քաղաքացիական անձանց, որոնց անունները տրամադրել են կողմերը։
‹‹Մեր այցերի նպատակն է հնարավորություն ունենալ գրանցելու ներկալվածներին, ստանալ կանոնավոր կերպով այցելելու հնարավորություն, ցուցաբերել աջակցություն, օրինակ՝ բժշկական, եթե դրա կարիքը կա, կալանքի պայմանների և ներկալվածի նկատմամբ վերաբերմունքի մոնիտորինգ իրականացնել, ինչպես նաև ապահովել իր և ընտանիքի միջև կապի պահպանում։ Մենք մեր բոլոր դիտարկումները ու առաջարկությունները քննարկում ենք ազատազրկման մեջ պահող իշխանությունների հետ։ ԿԽՄԿ-ն ձերբակալվածների վերադարձի վերաբերյալ որոշումներ չի կայացնում, սակայն, որպես չեզոք միջնորդ, մենք կարող ենք օգնել այդ գործընթացի կազմակերպմանը, եթե այդ մասին կա կողմերի որոշում››,- մանրամասնել է Է. Մուսայելյանը:
ԿԽՄԿ առաքելության խոսնակը կարևորել է, որ կողմերը տրամադրեն ձերբակալված բոլոր անձանց անունները:
