Պատերազմի հետևանքով Մարտունու շրջանի Նորշեն գյուղում խմելու ջրի հարցը դարձել էր օրակարգային: Պատճառը էլեկտրականության բացակայությունն էր, ինչի արդյունքում ջուրը ավազանից չէր մատակարարվում բնակիչներին:
Նորշենն ապահովվել է խմելու ջրով (Լուսանկարներ)
ՍՏԵՓԱՆԱԿԵՐՏ, 18 դեկտեմբերի, ԱՐՑԱԽՊՐԵՍ: «Թուֆենկյան» բարեգործական հիմնադրամի աջակցությամբ՝ Նորշենում տեղադրվել է դիզելային գեներատոր, որի շնորհիվ արդեն մի քանի օր է՝ գյուղում լուծվել է խմելու ջրի հարցը:
«Արցախպրես»-ի թղթակցի հետ զրույցում Նորշեն համայնքի ղեկավար Գևորգ Հարությունյանն ասել է, որ խմելու ջրի մատակարարումը շատ կարևոր է բնակիչների կենսական նշանակության հարցերի լուծման համար, քանի որ պատերազմի օրերին, երբ էլեկտրականության հետ կապված հարցեր էին առաջացել, համայնքը զրկված էր ջուր ունենալու հնարավորությունից, և ջրի մատակարարումն իրականացվում էր աղբյուրների ու մոտակա բնակավայրերի միջոցով:
365 բնակիչ ունեցող Նորշեն գյուղում 85 ընտանիք է ապրում: Համայնքի ղեկավարը դժվարանում է պատասխանել այն հարցին, թե դեռևս քանի ընտանիք չի վերադարձել Նորշեն, քանի որ գյուղը, որպես այդպիսին, վնասներ չի կրել, իսկ բնակիչներն էլ շարունակում են ամուր պահել թիկունքը, չնայած որ սահմանային հեռավորությունը հակառակորդից դարձել է 1.1 կմ:
Մեզ հետ զրույցում «Թուֆենկյան» բարեգործական հիմնադրամի արցախյան ծրագրերի կառավարիչ Էդվին Գրիգորյանն ասել է, որ այն համայնքները, որոնք ինքնահոս ջուր չունեն և օգտվում էին պոմպակայաններից, այսօր կանգնած են նմանատիպ խնդրի առաջ:
«Հիմնական պատճառը կապված է էլեկտրականության բացակայությամբ առաջացած խնդիրների հետ. օրերով հոսանք չունենալը, իսկ ունեցած դեպքում էլ շատ թույլ լինելը չի բավարարում, որպեսզի բնակիչները կարողանան օգտվել խմելու ջրից, ուստի հիմնադրամը շատ կարճ ժամկետում ձեռնամուխ է եղել խնդրի կարգավորմանը և ձեռք է բերել 65 Կիլովատտ հզորությամբ դիզելային գեներատոր»,- նշել է Է. Գրիգորյանը:
«Թուֆենկյան» բարեգործական հիմնադրամի արցախյան ծրագրերի կառավարիչը նշում է, որ անցած 15 տարիների ընթացքում, հիմնական աշխատանքները կենտրոնացրել են Քաշաթաղի շրջանում. ցավոք, այսօր ամեն ինչ անցել է հակառակորդի վերահսկողության տակ: Միաժամանակ հույս է հայտնում, որ այսուհետ բոլոր հնարավորությունները կկենտրոնացնեն, որպեսզի օգտակար լինեն Մարտունու շրջանին, որն այս պատերազմի արդյունքում տուժել է ամենից շատ:
Ըստ Է. Գրիգորյանի՝ այս պահին հիմնադրամի աշխատակիցների կողմից Մարտունու շրջանի մի շարք գյուղերում իրականացվում են ուսումնասիրություններ՝ վնասների չափը գնահատելու և առաջիկայում, ըստ այդմ, վերականգնմանն ուղղված աշխատանքներ իրականացնելու համար:
