Հայ հեղափոխական դաշնակցության Արցախի կառույցի երիտասարդական և ուսանողական միությունների նախաձեռնությամբ Ստեփանակերտում քիչ առաջ ավարտվել է «Հիշում ենք, պահանջում և վերադառնալու ենք» կարգախոսով ավանդական ջահերթը` ի հիշատակ Հայոց ցեղասպանության 106-րդ տարելիցի:
Ստեփանակերտում կազմակերպվել է ամենամյա ջահերթ
ՍՏԵՓԱՆԱԿԵՐՏ, 23 ապրիլի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ մինչ ջահերթը, միջոցառման մասնակիցները մայրաքաղաքի Սուրբ Հակոբ եկեղեցում մասնակցել են հոգեհանգստի պատարագին:
Այնուհետև նրանք եկեղեցու բակից շարժվել են դեպի Հայոց ցեղասպանության զոհերի հիշատակին կառուցված Զանգակատուն-հուշակոթող:
Երթի ընթացքում մասնակիցները հնչեցրել են «ճանաչում», «հատուցում» և ցեղասպանությունը դատապարտող այլ արտահայտություններ։
Զանգակատուն-հուշակոթողի մոտ ելույթով հանդես է եկել Արցախի թեմի առաջնորդ Տեր Վրթանես եպիսկոպոս Աբրահամյանը։
Նա իր խոսքում մասնավորապես ասել է, որ եթե ուզում ենք հաղթել, ապա պետք է միաբանվենք մեկ ճշմարիտ գաղափարախոսության շուրջ, որով կկարողանանք պահպանել մեր ինքնությունը, պետականությունը, եկեղեցին։
ԱՀ մարդու իրավունքների պաշտպան Գեղամ Ստեփանյանը մեզ հետ զրույցում նշեց, որ հայոց ցեղասպանությունը 20-րդ դարի մեծագույն ոճրագործությունն է, այն մարդկության դեմ ուղղված հանցագործություն է։
«Անպատժելիությունն այս տարիների ընթացքում դրսևորվել է նոր իրագործված հանցագործություններով, որոնցից ամենավերջինը 2020 թվականի սեպտեմբերին հայության դեմ նոր ցեղասպանական գործողություններն են։ Կարծում եմ, որ պահաջատիրության հարցում մեր կարևորագույն խնդիրը պետք է լինի քաղաքակիրթ աշխարհի կողմից դրա ճանաչումը, օսմանյան կայսրության տարածքում ապրող հայ բնակչության բոլոր իրավունքների վերականգնումը» -ընդգծել է Գ. Ստեփանյանը։ՀՅԴ բյուրոյի երիտասարդական թևի պատասխանատու Արշակ Մեսրոպյանի խոսքով՝ իրենց աշխարհասփյուռ երիտասարդական կառույցը լծված է հայ դատի արդար լուծման սուրբ առաքելությանը։
«Հայ դատի երկու կարևոր ուղղություններն են հանդիսանում հայոց ցեղասպանության միջազգային ճանաչումը , հատուցումը և Արցախի ճանաչումը։ Այս երկու ազգային հիմնախնդիրները փոխկապակցված են։ Քանի որ մարդկության դեմ ոճրագործությունները մնում են անպատիժ, ապա նոր հանցագործություններ են կատարվում։ Մենք պետք է ապավինենք միմիայն մեր սեփական ուժերին և լինենք վրիժառու», -ասել է Ա. Մեսրոպյանը։ՀՅԴ Արցախի կենտրոնական կոմիտեի անդամ Սերգեյ Շահվերդյանն իր ելույթում կարևոր է համարել ամենամյա ջահերթը։
«Ցեղասպանությանը նվիրված պահանջատիրական երթով ոչ միայն Թուրքիայից ենք պահանջում, այլև` Ադրբեջանից։ Արցախյան պատերազմին ի պատասխան մենք ունեցանք տեղահանված հայություն։ Մենք որքան էլ երթեր կազմակերպենք, ամեն դեպքում` մեր անվտանգության երաշխավորը հայ զինվորն է։ Պետք է վերականգնենք հայկական հզոր բանակը և ստեղծենք մեր ապագան»,- նշել է Ս. Շահվերդյանը։
Ճանապարհին ջահերթի մասնակիցները վառել են Թուրքիայի և Ադրբեջանի պետական դրոշները։
Միջոցառման վերջում «Մռակած» պետական երգչախումբը հանդես է եկել կատարմամբ։ Այնուհետև կատարվել է մոմավառություն։
